Etatelu 20 - La Bible en Otetela (Bible K'Ekila) 1991

Abarahama la Abimeleke

¹ Abarahama akunela uma leko, akaseko lu leke la diku dia kushi dia ntudjase lʼasa Kadeshe la Shura. Ndi akatukudjase la Ngerare,

² Abarahama akatatelaka antu dia wadendi Sara ati: Kadiyemi kendi. Ku Abimeleke khumʼekanga ka Ngerare, akatumi dikendji dia ntosa Sara, dia ndi ndjala wadendi.

³ Ku Unyashungu akene le Abimeleke lu do lʼutshu, akawutela ati: We aya uku udu lu dikambu dia umuntu lakayoshi, ne dia ndi eko la umi.

⁴ Lamʼaki Abimeleke kumbeyana la Sara, ndi akambula Unyashungu ati: Khumadiondjo, we mbeyaka ndjaka kuyanga wudja waha la unungu?

⁵ Aha ati: Kadiyemi kendi, mbakandamvutela? Ndu Sara ndame kumvutelami ati: Onalingu kendi? Mete, dimi lakatshi dikambu ne lʼutema wʼololo, ndu aha la munga.

⁶ Unyashungu akûkaluya diui lu do ati: Ee, dimi mbeyaka nti: We akatshi dikambu ne lʼutema wʼololo. Diako mbakamakushimbi dia we nsukana le ndi nti: Utukutsha kolo la ntundu kami.

⁷ Kakiane ukaluya umuntu one le umendi, ne dia umendi umvutshi mbendi. Ku ndi ayukolombela Unyashungu dia we ntshikala la lumu. Keli naka we hukaluya le ndi, eyi wati: Nyu tshe nyayuvo, ndu we ndu wane weli la ye tshe.

⁸ Abimeleke aketo kʼolomo la pindju, aketi ekambi andi tshe; akasanyia akambu ako tshe, ndu vo wakuki woma efula.

⁹ Abimeleke aketi Abarahama, akawumbula ati: Na wuhu wakayatutshela one na? Kolo kakona kakamakutshela dia we ntukitshiya, dimi la diulelu diami, kolo kene ka wuki? We akantshela wuhu wahakuki ntshela untu.

¹⁰ Abimeleke akambula Abarahama ati: Yimba yakona yakayakani dia we ntshelami wuhu one na?

¹¹ Ku Abarahama akûkaluya diui ati: Mete mete, lakakani nti: Wudja one hawuki Unyashungu woma wayundjaka lu dikambu dia wademi.

¹² Diui dia mete, kuyanga mbendi wademi, kadiyemi kendi. Dimi la ndi shesu otoi, keli aha utema otoi.

¹³ Okone lamʼakatutundja Unyashungu uma lu luudu la papa, dimi lakasengasenga Sara nti: Dia dimi mpumo lukulu lʼolo lu dikambu diaye, kutataka lu ahuli tshe wayututatshokaka wati: Onalingu kendi.

¹⁴ Abimeleke akose ekoko, ngombe, ekambi wʼapami la ekambi wʼamantu, akasha Abarahama, ndu akûkaluya wadendi Sara.

¹⁵ Abimeleke akawutela ati: Enda, kete yami tshe nye yeko la ntundu kaye, utudjase lene alangaye.

¹⁶ Ndi akatela Sara ati: Enda, lambusha onanyo tenyi dia fesa kinunu. Dikambu ne diayukunyia sonyi lu ashu wʼantu weli la ye. Ndu antu tshe wayukuyindja.

¹⁷ Okone Abarahama akalombela Abimeleke Unyashungu. Ku Unyashungu akokonoya, ndi la wadendi la ekambi andi wʼamantu, ku vo wakayuta ana,

¹⁸ ne dia Latuyalaka akete amantu tshe wa lu luudu la Abimeleke dikumba tu dikambu dia Sara, wadi a Abarahama.