Etatelu 2 - La Bible en Otetela (Bible K'Ekila) 1991

¹ Ulungu la kete wakashili ntungama, ndu diango tshe dieli loko.

² Ku lushi lʼesambeli, Unyashungu akakimo ulimu andi wakandatshaka. Ku ndi akumuya lushi lako uma lʼulimu andi tshe.

³ Unyashungu akatshokola lushi lʼesambeli, akalukidia, ne dia lushi lako mbakandumuya uma lʼulimu andi tshe wʼetungelu.

Untu lu Ekambo ka Edena

⁴ Okondo wʼetungelu kʼulungu la kete uku akawatungama one. Lu lushi lakatungi Latuyalaka Unyashungu,

⁵ ku nduku etumbatumba ka lʼusui kambuyala la kete, kuyanga diyu dia lʼusui diambutumba, ne dia laso ku Latuyalaka Unyashungu atalosha mvula la kete, ndu nduku untu akiko dia nkamba kete.

⁶ Keli eungungi kakambelaka uma lu kete kakaloyaka diku dia kete tshe.

⁷ Latuyalaka Unyashungu akatungi untu uma lu ditshu dia kete. Ndi akufufi luwi la lumu lu eshu wʼehembe. Ku pami akayala untu lasena

⁸ Ku Latuyalaka Unyashungu akune ekambo lu kete ya Edena, lu leke lʼehutwelu ka unya. Leko kakandakitsha untu lakandatungi.

⁹ Uma lu kete kakatumbia Latuyalaka Unyashungu wehu tshe wʼetamba weli amena lu ashu ndu weli ololo dia nde. Lʼatei ekambo kaki utamba a lumu ndu utamba wʼewu kʼakambu wʼololo ndu kʼakambu wa kolo.

¹⁰ Ndjali kakakelaka uma lʼatei a Edena dia ndoya ekambo. Uma leko, to kakatatana ekedi enei.

¹¹ Lukumbu lʼokedi a ntundu, Pishona. Vo watokelaka lʼutshimba a kete tshe ya Havila, lenʼeli paunyi.

¹² Paunyi ya lu kete yako yeli ololo. Leko katutanemaka wehu ehendi wʼave wʼushinga a wulu, bedeliume la dive dia pesopeso.

¹³ Lukumbu lʼokedi a hendi, Ngihona. Vo watokelaka lʼutshimba a kete tshe ya Kusha.

¹⁴ Lukumbu lʼokedi a satu, Hidekele. Vo watokelaka lʼumamu a kete yʼAsuriya, utsha lʼehutwelu ka unya. Lukumbu lʼokedi a nei, Eyufarate.

¹⁵ Latuyalaka Unyashungu akose untu, akukitsha lu ekambo ka Edena, dia ndi nkikambaka la nkilamaka.

¹⁶ Ku Latuyalaka Unyashungu akakokomiya untu ati: Olekaki elua wʼetamba tshe wa lʼekambo uku alangaye.

¹⁷ Keli, tolekaki elua wʼuma lʼutamba wa ewu kʼakambu wʼololo ndu kʼakambu wa kolo, ne dia lushi layuyole, we ayuvo.

¹⁸ Latuyalaka Unyashungu akati ati: Kema ololo pami ntshikala ndame. Dimi layutungela ukimanyidi lufanyi la ndi.

¹⁹ Uma lu kete kakatungi Latuyalaka Unyashungu nyama tshe ya la kete ndu fudu tshe ya lʼulungu. Ku ndi akayela le untu dia ndi mena okone ayolendi kumbu. Lukumbu tshe lakandole nyama la nyama mbakayala lukumbu lato.

²⁰ Okone untu akole dungalunga tshe kumbu, ndu fudu ya lʼulungu, ndu nyama tshe ya la kete. Laso ku untu atayala nduku la ukimanyidi lufanyi la ndi.

²¹ Latuvalaka Unyashungu akaladia pami djo ya wulu, ku ndi akalali. Okone Latuyalaka Unyashungu akose weka andi omotshi wa luhandju. Ndi akadihi emunyi lu dihuli diako.

²² La weka ako a luhandju wakandose uma le pami, mbakandatungi umuntu. Ku ndi akolombola utsha le pami.

²³ Pami akati ati: Weka a weka ami one, la umunyi wʼemunyi ami one. Vo wayuweta vati: Umuntu, ne dia uma le untu mbosamindi.

²⁴ Uma lu dikamlu ne, pami ayutshika shi la nyangu, ayumamana la wadendi, ku vo wayuyala dimba otoi.

²⁵ Pami la wadendi waki etakataka, keli vo kumbuka sonyi.