Etatelu 19 - La Bible en Otetela (Bible K'Ekila) 1991

Elanyelu ka Sodoma la Ngomora

¹ Andjelo ahendi wakakumi la Sodoma la dikolo. Lota akadjashi lʼeotwelo ka Sodoma. Lamʼakandawaenyi, ndi akunela dia ntalungula. Ndi akakhusamela.

² Ku ndi akati ati: Akhumemi, dimi lambunyosengasenga nti: Nyuhangi lu luudu lami, dimi ukambi anyu, elo. Nyusuli ekulu, nyulali loko Kanyeto kʼolomo la pindju dia nkolamela lu lokendo lanyu. Keli vo wakûkaluya diui vati: Kema, tayuhutuya unya lu esese wʼusumba.

³ Keli Lota akatekoya mbasengasenga, ku wakatshu lakandi, wakatoto lu luudu. Ndi akatshela dambu, akakatela ma diaha la edya, ku vo wakali.

⁴ Ntundu vo watetama, apami tshe wa lʼusumba a Sodoma wakadingi luudu lako. Wudja wʼutundu wakamote laawo.

⁵ Vo waketi Lota, wakawumbula vati: Apami wakotwe lu luudu laye lʼutshu one, landeʼewo na? Ututundjiyawo, keli teyani la wo.

⁶ Lota akayi la suku, akatumbi utsha le wo. Ku ndi akadihi lukuki ekongokongo.

⁷ Ndi akati ati: Nyu analingu, dimi lambunyosengasenga nti: Tanyutshaki dikambu dia kolo ne.

⁸ Nyulungi, dimi leko la anʼami wʼamantu ahendi wahateyana lʼapami. Dimi lambunyosengasenga nti: Nyetawo dimi nyutundjiyawo lʼandja; nyuyatsheli uku alanganyu. Keli tanyutshelaki apami ane wakayi lu luudu lami nduku dikambu.

⁹ Keli vo wakuhangwela vati: Mo la suku we! Wakatanela vati: Pami kene akayi ongendangenda, keli kakiane ndi ambuyadja umbadi. Kakiane, shu tayena la ye! Tayukutshela kolo kuleki kene kayutatshela. Vo wakatshindi Lota la wulu, ku wakasukana dia nkungula lukuki.

¹⁰ Apami ako waki lu luudu wakatundja anya, wakotshiya Lota uya le wo lu luudu, wakadihi lukuki.

¹¹ Ku vo wakete apami waki la suku, wa tshitshe ndu wa waki, tutshungu tutu. Ku vo tshe wakaheko nyanga lukuki, keli vo kumbeya lene elo.

¹² Apami ako wakambula Lota vati: Wana weki la ye lane ntu? Akilu aye wʼapami, ana apami, ana amantu, la wane weli la ye lʼusumba, umo la wo uma lu dihuli ne.

¹³ Mete, lundju lʼantu ane lambotekoya efula la ntundu ka Latuyalaka, diako mbakandatutumi dia ndjulanya usumba one.

¹⁴ Lota akatumbi, akatusawula la akilu andi wʼapami wakambela anʼandi. Ndi akawatela ati: Nyuneli, nyumo uma lu dihuli ne, ne dia Latuyalaka utsha nanya usumba one. Keli vo wakonyola aui andi vati: Aui wa sawusawu mbatandi.

¹⁵ La hyutshihutshi, andjelo wakatshutshiya Lota vati: Ose wadeye la anʼaye ahendi wʼamantu weli lane. Nyuneli esadi, nyutukuyuvo lʼelanyelu kʼusumba one.

¹⁶ Keli Lota akatshimbatshimba. Andjelo wakakimela lʼanya, ndi la waadendi la anʼandi ahendi wʼamantu. Wakalombola, wakatumbi la wo, wakatatshika lʼandja wʼusumba, ne dia Latuyalaka akalangi mbahandja.

¹⁷ Lamʼakawashili mbatundja uma lʼusumba, omotshi akawatela ati: Nyulawo, nyuyashimbeli. Tanyewoki lʼokongo anyu, ndu tanyemalaki lʼusui wa lʼukidi one. Nyulawo utsha lʼukungu nyutukuvo.

¹⁸ Lota akakaluya diui ati: Ai! Khumadiondjo, aha osoku!

¹⁹ Mete dimi ukambi aye, lakahumo lukulu lʼolo lu ashu aye, ne dia we ambotekoya mbukami ketshi dia nshimbela lumu lami. Haleyi ndawo utsha lʼukungu, elanyelu atukutumunda, ku dimi ntuvo.

²⁰ Enda, usumba omotshi one weli lasuki; vo weko tshitshe. Dimi nti: Ntushami leko mbayumuhanda, mbayumutshikala la lumu.

²¹ Ondjelo akûkaluya diui ati: Kawo, dimi lambukukela ndu lu dikambu so. Okone dimi halulanya usumba ako wutshiye.

²² Samanya, utushami leko. Dimi halutsha nduku dikambu tshikima we ambukuma leko. Wakole usumba ako lukumbu vati: Zoara (kitshimudi ati: Tshitshe).

²³ Lamʼakawandi unya, Lota akakumi la Zoara.

²⁴ Latuyalaka akaloshiva Sodoma la Ngomora ekama wa tsho kame la dja uma lʼulungu.

²⁵ Ndi akalanya esumba ako, usui tshe, antu tshe wakadjashi loko ndu tumbatumba tshe dia la kete.

²⁶ Wadi a Lota akewo lʼokongo, akahilo ekundji ka leho.

²⁷ Abarahama akunela kʼolomo la pindju, akatshu lu dihuli diakandemadi la ntundu ka Latuyalaka.

²⁸ Ndi akedia ashu utsha la Sodoma la Ngomora la wedja eku tshe wa lʼukidi. Endi ku dinga diutumba uma la kete uku luwu la wuki mbalungula.

²⁹ Kuyanga mbakalanya Unyashungu esumba tshe wa lʼukidi, ndi akuhoka Abarahama. Diako mbakandahandja Lota ntundu ndi atalanya esumba wa lene akandadjashi.

³⁰ Lota akaseko uma la Zoara utsha lʼukungu. Ndi la anʼandi ahendi wʼamantu wakatudjase leko lu wuku a dive, ne dia wakuki woma dia ntshikala la Zoara.

³¹ Ku onʼandi lʼenundu akatela kushendi ati: Shesu one aya usumbi, ku nduku pami lu wudja one kukuki mbeyana la su uku atuwutshaka lu kete tshe.

³² Yaka, tonosha shesu wanu, keli kateyani la ndi, diuhu dia shesu diatukushisho.

³³ Vo wakanosha shewo wanu lʼutshu. Okone ona lʼenundu akoto le shi, akateyana la ndi. Shi kumbeya etena kakayetama onʼandi, kuyanga etena kakandeto.

³⁴ Ku wedi a pindju ona lʼenundu akatela kushendi ati: We henyi, dimi lakeyanyi la papa utshu wʼelo. Eso tonesha wanu ndu lʼutshu one, keli kutshu ndu we, kuteyani la ndi, diuhu dia shesu diatukushisho.

³⁵ Osoku ndu lʼutshu uku vo wakanosha shewo wanu. Okone ona kushi akatshu, akateyana la ndi. Ku shi kumbeya etena kakayetama onʼandi la kushi, kuyanga etena kakandeto.

³⁶ Osoku ku ana ahendi aku wa Lota wakatshu waemi la shewo.

³⁷ Ona lʼenundu akuti ona pami, akawole lukumbu ati: Moaba (kitshimudi ati: Uma le papa). Ndi keli lotshetshe lʼasi Moaba edja ndu elo.

³⁸ Ndu ona kushi akuti ona pami, akawole ati: Bene-Ami (kitshimudi ati: Onʼa wudja ami). Ndi keli lotshetshe lʼasi Amona edja ndu elo.