Etatelu 17 - La Bible en Otetela (Bible K'Ekila) 1991

Ahemelu kʼUhekeli Eli Djimbitelu ya Daka

¹ Lamʼaki Abarama la deku akumi divwa la divwa, Latuyalaka akene le ndi, akawutela ati: Dimi leli Unyashungu, Kanga-Wulu-Tshe. Okendakendaki ololo la ntundu kami, ndu uyali ololo tshe.

² Dimi layushikike daka diami lʼasami la ye. Layufudia tukanula taye otekoya.

³ Abarama akakhusama la ntundu ka Unyashungu. Ku Unyashungu akawutela ati:

⁴ Enda, dimi lambukulaka daka diami ne nti: We ayuyala lotshetshe la wedja efula.

⁵ Dimi lambukete lotshetshe la wedja efula. Okone untu taketaki ntu ati: Abarama. Keli lukumbu laye layali Abarahama (kitshimudi atil lotshetshe la wedja efula).

⁶ Dimi layukete kanga diwutshi otekoya. Layutunga wedja efula uma le ye. Khumi ya dikanga efula yayutumba uma le ye.

⁷ Dimi layushikike daka diami lʼasami la ye ndu lʼasami la tukanula taye tayuto lʼokongo aye. Dio diayuyala le lolonga la lolonga. Daka ne diayuyala daka dia pundju le ye ndu le tukanula taye, dia dimi ndjala Unyashungu aye ndu a tukanula taye.

⁸ Kete yudjashiye ongendangenda mbayumunyusha, we la tukanula taye ta nonga la nonga. Kete tshe yʼasi Kanana yayuyala yanyu, we la tukanula taye pundju, Osoku dimi layuyalaka Unyashungu awo pundju.

⁹ Unyashungu akatela Abarahama ati: Nyulamaki daka diami, we la tukanula taye ta lolonga la lolonga.

¹⁰ Lamʼayutoka ona pami lʼatei anyu, kanyuwahemiaki uhekeli. Oso eli olembe wa daka diayunyulamaka, we la tukanula taye.

¹¹ Kanyahemaki uhekeli. Oso ayuyala djimbitelu ya daka diasami la nyu.

¹² Kanyahemiaki ona pami tshe layutoka lʼatei anyu uhekeli lamʼayundukuka nshi enanei. Etshelu kene kayuyalaka le ana tshe wa lolonga la lolonga, kuyanga le ona layunyukundja uma le untu lahuto la nyu.

¹³ Le ona lambuto lu luudu lanyu kana le ona lambunyusumba la falanga, dieli la nyu dia mbahemia uhekeli. Ku djimbitelu ya daka diami yayutshikala pundju lu alimba anyu.

¹⁴ Usika pami tshe lahahema uhekeli ayutshanyema uma lu wudja andi, ne dia ndi ambudiaka olembe wa daka diami.

¹⁵ Unyashungu akatela Abarahama ati: Tetaki wadeye ntu wati: Sarai, ne dia umaka kakiane lukumbu landi layuyala Sara (kitshimudi ati: Umuntu la nemo).

¹⁶ Dimi layotshokola, ku ndi ayukutela ona pami, Ee, dimi layotshokola, la ndi ayuyala lotshetshe la wedja efula. Ku khumi ya dikanga ya wedia efula yayutumba uma le ndi.

¹⁷ Abarahama akako ekhukhumadi; akole ata lʼutema ati: Untu laya la deku lukama mbeyaka mbuta ona? Ndu Sara laya la deku akumi divwa, mbeyaka mbuta ona uka?

¹⁸ Ku Abarahama akasengasenga Unyashungu ati: Unyashungu li, Ishamele akendakendaki ololo la ntundu kaye!

¹⁹ Unyashungu akûkaluya diui ati: Mete mete wadeye Sara kayukutela ona pami, kuwole wati: Isaka (kitshimudi ati: Tola). Okone dimi layushikike daka diami le ndi ndu le tukanula tandi pundju.

²⁰ Lu dikambu dia Ishamele dimi lakakukela. Dimi layotshokola, layuwete kanga diwutshi, layfifudia otekoya. Ndi ayuta ewandji dikumi la ehendi. Ndu layutunga wudja a wuki uma le ndi.

²¹ Keli dimi layushikike daka diami le Isaka, ona layukutela Sara, lʼetena uku kene lʼeleku kʼuyuyu.

²² Lamʼakawashidiya nsawula, Unyashungu akatshiki Abarahama, akambela utsha lʼulungu.

²³ Ku Abarahama aketi apami tshe wa lu luudu landi, onʼandi Ishamele la ana wʼekambi andi tshe wakuto lu luudu landi, ndu wane tshe wakandasumbi lusumba. Ku lushi lako ndi akawahemia uhekeli vo tshe, uku akawutela Unyashungu.

²⁴ Ndu Abarahama ndame akayahema uhekeli lamakindi la deku akumi divwa la divwa.

²⁵ Laso ku ndu Ishamele akayahema uhekeli lamʼakindi la deku dikumi la satu.

²⁶ Okone Abarahama la onʼandi Ishamele wakahema uhekeli lushi lame.

²⁷ Ndu apami tshe wa lu luudu landi, wane wakuto lu luudu landi ndu wane wakandasumbi lusumba uma lu kete kina, wakahema uhekeli kame la ndi.