Etatelu 11 - La Bible en Otetela (Bible K'Ekila) 1991

Luudu l Etangelu

¹ Antu tshe wa la kete waki la oteketa wame ndu aui wuhu otoi.

² Lamʼakawatatshokaka utsha lene atehutoka unya, vo wakatushula usui lu kete ya Shinare, ku vo wakatudjase loko.

³ Vo wakatanela vati: Nyeso, tutshi atafadi, tatshumbi ololo. Atafadi ako wakakiti dihuli dia ave lʼulimu awo. Vo waki la nombe lu dihuli dia potopoto.

⁴ Ku vo wakati ntu vati: Tuyahikeli usumba, ndu luudu lʼetangelu layukuma ote alo pulu ndu lʼulungu. Tuyali la lukumu, tutukudiangana la kete tshe.

⁵ Ku Latuyalaka akahulo dia ndjende usumba ako la luudu lʼetangelu lakahiki antu.

⁶ Ndi akati ati: Mete, antu ane weko wudja otoi, ndu vo tshe nteketaka oteketa wame. Lamʼatatelawo ntsha okone, nduku dikambu diayeya mbashimba lu akambu wayuwusanguya ntsha.

⁷ Tutshu, tuhulo, tutufutanya oteketa awo, vo watukukana lamʼateketawo.

⁸ Osoku Latuyalaka akadianganya etali lu beke tshe dia kete, ku vo wakakimo mpika usumba ako.

⁹ Lu dikambu diako mbakawole usumba ako vati: Babele (kitshimudi ati: Nfutanya), ne dia uma laawo mbakafutanya Latuyalaka oteketa wakawateketaka lu kete tshe. Ndu uma leko kakadianganya Latuyalaka lu kete tshe.

Tukanula ta Sheme

¹⁰ Tukanula ta Sheme tone: Deku pendi lʼokongo wʼelula lamʼakayala Sheme la deku lukama, ndi akuti Arapakeshade.

¹¹ Sheme akalumbi deku kama tshanu lʼokongo wʼeutwelu ka Arapakeshade. Ndi akuti ana apami la ana amantu.

¹² Lamʼaki Arapakeshade la deku akumi asatu la tanu, ndi akuti Shela.

¹³ Arapakeshade akalumbi deku kama nyei la satu lʼokongo wʼeutwelu ka Shela. Ndi akuti ana apami la ana amantu.

¹⁴ Lamʼaki Shela la deku akumi asatu, ndi akuti Ebere.

¹⁵ Shela akalumbi deku kama nyei la satu lʼokongo wʼeutwelu ka Ebere. Ndi akuti ana apami la ana amantu.

¹⁶ Lamʼaki Ebere la deku akumi asatu la nei, ndi akuti Pelenge.

¹⁷ Ebere akalumbi deku kama nyei la akumi asatu lʼokongo wʼeutwelu ka Pelenge. Ndi akuti ana apami la ana amantu.

¹⁸ Lamʼaki Pelenge la deku akumi asatu, ndi akuti Reu.

¹⁹ Pelenge akalumbi deku kama hyendi la divwa lʼokongo wʼeutwelu ka Reu. Ndi akuti ana apami la ana amantu.

²⁰ Lamʼaki Reu la deku akumi asatu la pendi, ndi akuti Serunge.

²¹ Reu akalumbi deku kama hyendi la esambeli lʼokongo wʼeutwelu ka Serunge. Ndi akuti ana apami la ana amantu.

²² Lamʼaki Serunge la deku akumi asatu, ndi akuti Nahora.

²³ Serunge akalumbi deku kama hyendi lʼokongo wʼeutwelu ka Nahora. Ndi akuti ana apami la ana amantu.

²⁴ Lamʼaki Nahora la deku akumi ahendi la divwa, ndi akuti Tera.

²⁵ Nahora akalumbi deku lukama la dikumi la divwa lʼokongo wʼeutwelu ka Tera. Ndi akuti ana apami la ana amantu.

²⁶ Lamʼaki Tera la deku akumi esambeli, ndi akuti Abarama, Nahora, la Harana.

Tukanula ta Tera

²⁷ Tukanula ta Tera tone: Tera akuti Abarama, Nahora, la Harana. Harana akuti Lota.

²⁸ Harana akavu lu kete ya Ura ka la Kaladiya, lene akanduto, ku shi eki la lumu.

²⁹ Abarama la Nahora wakatshuki wadi. Lukumbu la wadi Abarama laki la Sarai; la lukumbu la wadi Nahora laki Milika, ona aki Harana. Harana akuti Milika ndu Isika.

³⁰ Sarai aki ekumba, ndi taki la ona.

³¹ Tera akunela, ndi la onʼandi Abarama, la ukana andi Lota, onʼa Harana, ndu la Sarai wadi onʼandi Abarama. Vo wakunela kame uma la Ura ka la Kaladiya utsha lu kete ya Kanana. Vo wakatukuma la Harana, wakatukutudjase leko.

³² Nshi ya lumu tshe ya Tera yaki deku kama hyendi la tanu. Ku ndi akavu leko, la Harana.