Etatelu 1 - La Bible en Otetela (Bible K'Ekila) 1991

Etungelu

¹ Ntunduntundu Unyashungu akatungi ulungu la kete.

² Etena kako andja aki anyanya ndu atalongoswama. Andja tshe aki udjima utu. Nyuma ka Unyashungu aketetaka ladiku dia ashi tshe.

³ Unyashungu akati ati: Usasi ayali. Ku usasi akayala.

⁴ Ndi akenyi ati: Usasi ololo. Ku ndi akatanya usasi la udjima.

⁵ Ndi akole usasi ati: Yanyi; ndu udjima ati: Utshu. Dikolo diakayala, pindju kakayala. Oso aki lushi la ntundu.

⁶ Unyashungu akati ati: Dungulungu diayali, dia mbatanya ashi.

⁷ Ndi akakitsha dungulungu dia mbatanya ashi wa la tshina la wa ladiku. Ku dikambu so diakayala.

⁸ Ndi akole diku dia dungulungu ati: Ulungu. Dikolo diakayala, pindju kakayala. Oso aki lushi la hendi.

⁹ Unyashungu akati ati: Ashi tshe wa lʼesi ulungu wamotshami lu dihuli diame; kete yʼufumbu yenami. Ku dikambu so diakayala.

¹⁰ Ndi akole ufumbu ako ati: Kete; ndu ashi tshe wakamotshama ati: Ashi a waki. Ku ndi akenyi ati: Ukuku kawo.

¹¹ Ndi akati ati: Kete yatumbia adiyu, la tumbatumba dia nto wehu. Etamba wato elua uku wehu awo lakete. Ku dikambu so diakayala.

¹² Kete yakatumbia adiyu, la tumbatumba diakato elua uku wehu adio. Ndu etamba wakato elua uku wehu awo. Ndi akenyi ati: Ukuku kawo.

¹³ Dikolo diakayala, pindju kakayala. Oso aki lushi la satu.

¹⁴ Unyashungu akati ati: Esasi wayali lʼulungu, dia mbatanya yanyi la utshu. Vo wayali tulimbitelu ta deku la nshi ndu enonyi.

¹⁵ Vo wayali esasi lʼulungu, wa nsenya kete. Ku dikambu so diakayala.

¹⁶ Unyashungu akatungi esasi ehendi a waki. Usasi wuleki wuki, dia mbulela la yanyi; la one wʼusekaseka, dia mbulela lʼutshu. Ndi akatungi ndu toto.

¹⁷ Ndi akekitsha lʼulungu dia vo nsenya kete,

¹⁸ ndu dia vo mbulela la yanyi ndu lʼutshu, la dia vo mbatanya yanyi la utshu. Ku ndi akenyi ati: Ukuku kawo.

¹⁹ Dikolo diakayala, pindju kakayala. Oso aki lushi la nei.

²⁰ Unyashungu akati ati: Ashi wayali la dikendakenda dieli la lumu. Ndu fudu yafumboki lu dungulungu dieli iʼasa ulungu la kete.

²¹ Ndi akatungi dikendakenda tshe diatokendakendaka lu ashi, dia waki ndu dia tshitshe, uku wehu adio; ndu fudu tshe uku wehu ayo. Ku ndi akenyi ati: Ukuku kawo.

²² Ndi akaditshokola ati: Nyutani, nyufulaneli, ndu nyululaneli lu ashi a waki. Ndu fudu yafulaneli ladiku dia kete.

²³ Dikolo diakayala, pindju kakayala. Oso aki lushi la tanu.

²⁴ Unyashungu akati ati: Dikendakenda dieli la lumu, dungalunga, tumbatumba, la nyama kina tshe yayali la kete uku wehu ayo. Ku dikambu so diakayala.

²⁵ Ndi akatungi nyama tsne ya la kete uku wehu ayo, dungalunga uku wehu adio, ndu dikendakenda diayakutula uku wehu adio. Ku ndi akenyi ati: Ukuku kawo.

²⁶ Unyashungu akati ati: Tutungi untu lufanyi la su, lu efanelu kaiu. Ndi kuleli nsi ya lu ashi a waki, fudu ya lʼulungu, dungalunga dia la kete tshe, la tulambalamba tshe talamba ladiku dia kete.

²⁷ Unyashungu akatungi untu lu efanelu kandi. Lu efanelu kandi kakandutungi. Pami la umuntu mbakandatungi.

²⁸ Ndi akatshokola; akawatela ati: Nyuyali la diwutshi, nyufulaneli, nyuludia kete, nyunyuleli. Nyuleli nsi ya lu ashi a waki, fudu ya lʼulungu, la dikendakenda tshe dieli la lumu diakendakenda la kete.

²⁹ Ku Unyashungu akati ati: Enda, dimi lambunyusha tumbatumba tshe diato elua dieli ladiku dia kete, ndu etamba tshe wato elua. Vo wayali mbu ya nde yanyu.

³⁰ Dimi lambukimo tumbatumba tshe le nyama tshe ya la kete, le fudu tshe ya lʼulungu, ndu le tulambalamba tshe ta la kete, dia dio ndjala mbu ya nde yawo. Ku dikambu so diakayala.

³¹ Unyashungu akenyi kene tshe kakandatungi ati: Ukuku kawo. Dikolo diakayala, pindju kakayala. Oso aki lushi la samalu.