Esta 7 - La Bible en Otetela (Bible K'Ekila) 1991

Wambuhane Hamana

¹ Khumʼekanga la Hamana wakatshu lu dambu laka khumʼekanga ka umuntu Esta.

² Lushi lako la hendi, khumʼekanga akambula Esta ntu lamʼakawanokaka wanu ati: Khumʼekanga ka umuntu Esta, na elombelo kaye? Wayukushato. Kuyanga etenyi otoi ka hendi ka diulelu, we ayukilungula.

³ Ku khumʼekanga ka umuntu Esta akûkaluya diui ati: Khumʼekanga li, naka dimi lambuhumo lukulu lʼolo lu ashu aye, ndu naka we khumʼekanga nangaka, ushimbeli lumu lami! oso eli elombelo kami; ndu, ushimbeli wudja ami! oso eli lulangu lami.

⁴ Shu takasundjama dimi la wudja ami, dia shu nanyema, ndjakema la shilama ushiki. Keli naka shu takasundjama dia ndjala fumbi la ekambi wʼamantu, ku dimi lambolembohala, utunyi heya nfuta khumʼekanga elanyelu kutshendi.

⁵ Khumʼekanga Ahasuero akahula diui, akambula khumʼekanga ka umuntu Esta ati: Na ndi na? Lendʼeli one lasanguya dia ntsha osoku?

⁶ Ku Esta akûkaluya diui ati: Uhetshi, utunyi, eli Hamana, pami kolo kene! Hamana akandama la woma wa mamba la ntundu ka khumʼekanga la khumʼekanga ka umuntu.

⁷ Ku lamʼakuki khumʼekanga kele, ndi akunela, akatshiki dambu, akatshu utsha lʼekambo ka luudu la khumʼekanga. Hamana akatshikala dia nomba eku le khumʼekanga ka umuntu Esta, ne dia ndi akenyi ololo ati: Elanyelu kandi kakayadi lu lumu la khumʼekanga.

⁸ Lamʼakakalula khumʼekanga uma lʼekambo ka luudu la khumʼekanga uya lene akawanoka wanu, atani ku Hamana one akayasungutudi lu tangi, lene aki Esta. Ku ndi akati ati: Aha dia ntshela khumʼekanga ka umuntu la ngala la ntundu kami, ka lʼatei a luudu lami? Kamʼakatumbi diui so uma lʼunyo wa khumʼekanga, wakakumbi elundji ka Hamana.

⁹ Harabona, olenga omotshi lʼatei wʼelenga wakakambelaka khumʼekanga ulimu, akati ati: Enda, utamba weli la utali wa kubita akumi atanu, wakalongosola Hamana dikambu dia Morodekai lakateketa dikambu diʼololo dia khumʼekanga, weko lu luudu la Hamana. Khumʼekanga akati ati: Watuhane loko.

¹⁰ Ku vo wakahane Hamana lʼutamba wakandalongosola dikambu dia Morodekai. Kele ka khumʼekanga akakitakita.