Esta 6 - La Bible en Otetela (Bible K'Ekila) 1991

Wambutshutshiya Hamana dia Nemia Morodekai

¹ Lʼutshu, khumʼekanga kumbeya ndala. Ndi akatumi untu dia ndi mbela buku diʼEkondo. Vo wakali ekondo ako la ntundu ka khumʼekanga.

² Vo wakatani uku akashula Morodekai dikambu dia Bingitana la Tereshe, elenga ehendi wa khumʼekanga, wakalamaka mbalasa, uku akawalangi mbahe khumʼekanga Ahasuero lunya.

³ Khumʼekanga akambula ati: Na dikambu diakawatshela Morodekai dia mbolemia lu dikambu so? Ku ekambi wa khumʼekanga wakukimanyiaka, wakûkaluya diui vati: Vo kumbutshela nduku dikambu.

⁴ Ku khumʼekanga akambula ati: Akona eli lu seke? Etena keso ku Hamana ambukuma lu seke dia luudu la khumʼekanga, dia ndjolomba khumʼekanga dia vo mpane Morodekai lʼutamba wakandalongosola dikambu diandi.

⁵ Ekambi wa khumʼekanga wakûkaluya diui vati: Hamana kemadi lu seke. Khumʼekanga akawatela ati: Ndi oto.

⁶ Hamana akoto, ku khumʼekanga akawumbula ati: Ngandi ukukiwo ntshela untu lalanga khumʼekanga nemia? Hamana akati lʼutema ati: Na untu ukina, aha dimʼoso alanga khumʼekanga nemia?

⁷ Ku Hamana akakaluya khumekanga diui ati: Le untu lalanga khumʼekanga nemia,

⁸ dieli la wo dia mbosa ahondo wa diulelu watolotaka khumʼekanga, falasa katahemaka khumʼekanga, la dembo dia kusu diatundaheka,

⁹ ku nkimo ahondo la falasa le uwandji a wuki omotshi, dia ndotsha untu lalanga khumʼekanga nemia, la nkindula la ndi lu falasa lʼusumba, ku ntahangohangoka la ntundu kandi ati: Okone mbatuwutshelaka untu lalanga khumʼekanga nemia.

¹⁰ Ku khumʼekanga akatela Hamana ati: Ose ahondo la falasa esadi uku wutshiye, utsheli Morodekai, usi Juda, ludjashi la suku dia khumʼekanga osoku. Tutshikaki nduku dikambu lu aui tshe wakayatshi.

¹¹ Ku Hamana akose ahondo la lalasa, akalotsha Morodekai. Ndi akakindula la ndi lu falasa lu dihuli la dihuli lʼusumba, atahangohango la ntundu ka ndi ati: Okone mbatuwutshelaka untu lalanga khumʼekanga nemia.

¹² Morodekai akakalula la suku dia khumʼekanga, ku Hamana akakalula esadi utsha lakandi la lunyangu la ote kolaa.

¹³ Hamana akatusanyia wadendi Zereshe la engenyi andi tshe dikambu diakayala le ndi. Ku akanga a tumba andi la wadendi Zereshe wakawutela vati: Naka Morodekai, lakayatatela nko la ntundu kandi, eko uma lu diuhu diʼasi Juda, we heya mbutshela nduku dikambu. Keli we ayoko la ntundu kandi.

¹⁴ Kamʼakawateketaka la ndi, ku elenga wa khumʼekanga wambukuma. Vo wakatshu la Hamana esadi utsha lu dambu diakalongosola Esta.