Esta 4 - La Bible en Otetela (Bible K'Ekila) 1991

Esta Ambulaka dia Nteketela Wudja Awo

¹ Lamʼakeyi Morodekai akambu tshe wakatshama, ndi akatshatsha ahondo andi, akalote dikutu, akayatela utuku. Ku ndi akatshu kʼatei usumba, atadi ekuku a wulu.

² Ndi akatshu pulu ndu la suku dia khumʼekanga, diaki olembe waha untu lolote dikutu mboto.

³ Lu beke tshe diakakumi olembe la didjangu dia khumʼekanga, lunyangu la wulu lakayala lʼatei wʼasi Juda. Vo wakakili ma, wakaleli la ekuku a wulu. Antu efula waketama lu akutu, lu etuku.

⁴ Ekambi wʼamantu wa Esta la elenge andi wakatuwutela dikambu so, ku ndi akate sulu. Ndi akatumela Morodekai ahondo wa ndota, dia ndi nkulula dikutu, keli ndi kunanga.

⁵ Esta aketi Hataka, olenga omotshi wa khumʼekanga, wakandakitsha dia namaka Esta, akutumi le Morodekai dia mbeya dikambu diambutumba, ndu uma lendi uyedio.

⁶ Ku Hataka akatshu le Morodekai lu seke dia wuki diʼusumba, diaki la ntundu ka suku dia khumʼekanga.

⁷ Morodekai akawutela akambu tshe wakayala le ndi, ndu efula ka falanga kakalaki Hamana dia mbidja lu waumbelu wa khumʼekanga, difutu dia nshila asi Juda ushiki.

⁸ Ndi akawusha ndu dikatshi diakafundama olembe wakadiangana lu Susa lu dikambu dia mbadiaka, dia ndi ntudienya Esta la ntusanyia olembe ako, la dia ntuwutela dia ndi ntsho lʼongenongeno le khumʼekanga la ntolomba lu dikambu dia wudja andi.

⁹ Hataka akayutela Esta aui wa Morodekai.

¹⁰ Esta akatumi Hataka dia ntutela Morodekai ati:

¹¹ Ekambi tshe wa khumʼekanga ndu antu wa lu beke dia weuja uia khumʼekanga mbeyaka vati: Olembe otoi weko wa ndjaka untu tshe, pami kana umuntu, layota le khumʼekanga lu seke dia lʼatei, lakiwo kumbeta. Tshikima one lutshumi khumʼekanga danga dia paunyi, kukuki mbika. Enda, lʼatei a nshi akumi asatu nye, khumʼekanga atambeti.

¹² Wakatutela Morodekai aui wa Esta.

¹³ Ku Morodekai akatumela Esta diui ati: Tukanaki wati: We kayuhanda lʼatei wʼasi Juda tshe ne dia we eko lu luudu la khumʼekanga.

¹⁴ Naka we ayolembohala ki kakiane, ekimanyelu la etshungwelu kayuya le asi Juda uma lu leke lukina, keli we la khumbu ka sho nyayudiakema. Eya kana lu dikambu diambutumba lʼetena kene, mbakayakumi lu diulelu?

¹⁵ Ku Esta akatumela Morodekai diui ati:

¹⁶ Utshu, utusanganya asi Juda tshe weli lu Susa, nyutunkileli ma, tanyolekaki, tanyonokaki yediko ya nshi shatu lʼutshu kana la yanyi. Ndu dimi la ekambi ami wʼamantu tayukila ma pupu. Ku dimi layutoto le khumʼekanga, kuyanga mbeko olembe Naka dia mvo, ku dimi mvo.

¹⁷ Morodekai akunela, akatutsha akambu tshe wakawutela Esta.