Esta 2 - La Bible en Otetela (Bible K'Ekila) 1991

Esta Ambuyala KhumʼEkanga ka Umuntu

¹ Lʼokongo diku lamʼakakitakita kele ka khumʼekanga Ahasuero, ndi akuho Vashiti la dikambu diakandatshi ndu didjangu diakandadji lu dikambu diandi.

² Ekambi wakati vati: Wayangeli khumʼekanga esekaseka wʼamantu weki dimuma ndu wʼamena.

³ Khumʼekanga adji elohe lu beke tshe dia diulelu diandi, dia vo nsanganya esekaseka wʼamantu tshe weki dimuna ndu amena, dia mbaela la Susa, usumba a wuki, lu luudu lʼamantu la khumʼekanga, la tshina dia elamelu ka Hengai, olenga a khumʼekanga laki la okende wa nama amantu, layuwashaka diango dia vo ndjaedia.

⁴ Ku usekaseka a umuntu layongenyangenya khumʼekanga, ayuyala wadi a khumʼekanga ka umuntu lu dihuli dia Vashiti. Aui aso wakangenyangenya khumʼekanga, ku ndi akatshi.

⁵ Usi Juda omotshi, lukumbu landi Morodekai, onʼa Jayira, onʼa Shimei, onʼa Kisha, usi Bendjamina, akadjashi la Susa, usumba a wuki.

⁶ Nebukadineza, khumʼekanga ka Babilona, akawembe uma la Jerusalema lʼului wʼafumbi wakambema, wakandatole kame la Jekoniya, khumʼekanga ka Juda.

⁷ Ndi akudia Hadasa, letawo vati: Esta, onʼa onangu shi, ne dia shi la nyangu wakavu. Usekaseka ako aki la diema dia dimena. Lamʼakavu shi la nyangu, Morodekai akawete onʼandi.

⁸ Lamʼakawadianganya didjangu dia khumʼekanga la olembe andi, ku wakasanganya esekaseka wʼamantu efula lu usumba a wuki wa Susa, la tshina dia elamelu ka Hengai. Esta akosama lu luudu la khumʼekanga la tshina dia elamelu ka Hengai, ulami wʼamantu.

⁹ Usekaseka a umuntu ako akangenyangenya Hengai, akahumo lukulu lʼolo lu ashu wa Hengai, ku ndi akawusha diango esadi dia ndi ndjaedia, ndu mbu ya nde, ndi la esekaseka wʼamantu esambeli wakandasonola uma lu luudu la khumʼekanga. Ndi akosekola ndi la ekambi andi wʼamantu utsha lu dihuli diuleki dimena lu lukumbu lʼamantu.

¹⁰ Esta kumvutela antu wudja andi kuyanga khumbu kandi, ne dia Morodekai akusike dia ndi mvuta.

¹¹ Morodekai akatshokaka la lushi la lushi lu welelo wa seke dia lukumbu lʼamantu, dia nteya okone eli Esta, ndu uku akawutshelaka.

¹² Lamʼakashili esekaseka wʼamantu mbediama ngondo dikumi la hyendi, uku aki olembe le amantu, usekaseka lʼusekaseka a umuntu akatshu etena kandi le khumʼekanga Ahasuero; vo wakayalongosola okone: ngondo shamalu iso, la ngondo shamalu diango diʼepumu la malashi kame la diango dia mbedia amantu.

¹³ Osoku mbakayi usekaseka lʼusekaseka a umuntu le khumʼekanga. Ku lamʼakandeti uma lu luudu lʼamantu utsha lu luudu le khumʼekanga, wakukimwela dia ndi mbosa kene tshe kakandalangi.

¹⁴ Ndi akoto le khumʼekanga la dikolo, ku wedi a pindju ndi aketi lu luudu lukina lʼamantu, la tshina diʼelamelu ka Shashingaze, olenga wa khumʼekanga, ulami wʼeseka andi. Usekaseka ako kumbeya nkalula le khumʼekanga ntu, tshikima ndi kakaweti lukumbu.

¹⁵ Lamʼakakuki etena ka Esta, onʼa Abihayili, onangu shi Morodekai lakawete ona, ntsho utsha le khumʼekanga, ndi konomba nduku engo, tshikima kene kakawutela Hengai, olenga wa khumʼekanga, laki la okende wʼamantu. Esta akahumoka lukulu lʼolo lu ashu a wane tshe wakawenaka.

¹⁶ Lu ngondo ka dikumi, ketawo ngondo ka Tebete, eleku kʼesambeli ka diulelu dia khumʼekanga Ahasuero, kakalombwama Esta utsha le ndi, lu luudu la diulelu.

¹⁷ Khumʼekanga akalangi Esta ndeka amantu akina tshe, ku ndi akukama ngandji ka mamba la ketshi la ntundu kandi uleki esekaseka wʼamantu ekina tshe. Ndi akulimbi dembo dia kusu dia lu khumʼekanga lʼote; akawete khumʼekanga ka umuntu lu dihuli dia Vashiti.

¹⁸ Khumʼekanga akatshela ewandji andi tshe la ekambi andi dambu dia nemia Esta. Ndi akasha beke dia wudja mumuya, ndi akakimo eshasha uku atukahaka khumʼekanga.

Morodekai Ambushula Sheki Yakawadjela Khumʼekanga

¹⁹ Etena ka hendi kakawasanganya esekaseka wʼamantu, Morodekai akadjashi la suku dia khumʼekanga.

²⁰ Esta kumvuta khumbu kandi kuyanga wudja andi, ne dia Morodekai akushimbi. Ndi akayeli aui wa Morodekai la kolamelu, uku lu nshi yakandawudiaka.

²¹ Lʼetena kako, lamʼakadjashi Morodekai la suku dia khumʼekanga, Bingitana la lereshe, elenga ehendi wa khumʼekanga, alami wa suku, wakuki kele, wakalangi mbahe khumʼekanga Ahasuero lunya.

²² Morodekai akeyi dikambu; akatutela khumʼekanga ka umuntu Esta. Ku ndi akatutela khumʼekanga dikambu diako lu lukumbu la Morodekai.

²³ Vo wakayangi dikambu diako, ku dio diakatanema mete. Okone wakahane elenga ako ehendi lʼutamba. Ku dikambu so diakafundama lu Buku diʼEkondo la ntundu ka khumʼekanga.