Esambu 97 - La Bible en Otetela (Bible K'Ekila) 1991

Diulelu la Wulu wa Latuyalaka

¹ Latuyalaka kuledi; kete yangenengene, Elui wʼantu watudjaseka lu asenga wayali la ongenongeno!

² Wangi la udjima watudingaka. Sambu kʼololo la uluwanyi weko etshina ka kiti kandi ka diulelu.

³ Dja yatutshokaka la ntundu kandi, Yatutshumbaka atunyi weli lʼutshimba andi.

⁴ Angadimu andi watosenyaka andja, Kete yakenyi, yakasaki lukumba.

⁵ Ekungu wakalelo uku tsho la ntundu ka Latuyalaka, La ntundu ka Khumi ka kete tshe.

⁶ Ulungu atutaka dia sambu kandi kʼololo, Ku wedja tshe watenaka lutumbu landi.

⁷ Waku tshe watotemolaka ditemolatemola dia losela, Ndu watuyalaka la osemo ne dia dikishi diawo, wutshami sonwi. Nyu ditemolatemola tshe, nyotemole.

⁸ Siona akuki, ku akayala la ongenongeno; Ana wʼamantu wa Juda wakangenengene, Ne dia dumbwelu diaye, we Latuyalaka!

⁹ We Latuyalaka keli KhumʼUʼlungu ladiku dia kete tshe. We akediama etali ladiku dia ditemolatemola tshe.

¹⁰ Nyu wane watukaka Latuyalaka ngandji, nyuhetshaki kolo. Ndi katulamaka nyumu yʼekilami andi, Katatshungulaka uma lʼanya wʼantu a kolo.

¹¹ Usasi atohetaka ne dia antu wʼololo, Ndu ongenongeno atuyalaka ne dia akanga wʼetema wʼusimbwi.

¹² Nyu antu wʼololo, nyongenangenaki le Latuyalaka, Nyukaki lusaka ne dia mbuhoka lukumbu landi lʼekila!