Esambu 96 - La Bible en Otetela (Bible K'Ekila) 1991Usambu a Diandu ( 1 Ek. 16:23-33 ) 1 Nyimbeli Latuyalaka usambu wʼuyuyu! Nyu wa la kete tshe, nyimbeli Latuyalaka! 2 Nyimbeli Latuyalaka, nyutumbuli lukumbu landi, Nyutaki dia panda kandi la lushi la lushi! 3 Nyusanyaki lutumbu landi lʼatei a wedja, La elimu andi wa mamba lʼatei antu tshe. 4 Latuyalaka keli wuki, ndi kukuki ntumbwama efula, Kukuki mbukama wama ladiku dia ditemolatemola tshe, 5 Ne dia ditemolatemola tshe diʼantu dieko dikishi. Keli Latuyalaka kakatungi ulungu. 6 Nemo la lutumbu weko la niundu kandi, Wulu la dimena weko lʼetemwelo kandi. 7 Nyu wauhu wʼantu, nyanduli Latuyalaka, Nyanduli Latuyalaka ne dia lutumbu la wulu andi! 8 Nyanduli Latuyalaka la lutumbu ledimi la lukumbu landi! Nyela elambu, nyoto lu aseke andi. 9 Nyotemole Latuyalaka lʼotemwelo wuleki dimena wa shikaa. Nyu wa la kete tshe, nyudidimaki la ntundu kandi! 10 Nyutelaki wedja nyati: Latuyalaka kuledi, Ndu andja watushikikalaka, haweyi nsutshasutshama. Unyashungu ayusambula akambu aha la shonodi. 11 Ulungu angenengene, kete atamanya ngenangena. Ashi a waki wadikitaki kame la diango tshe dieli loko. 12 Usui angenengene kame la diango tshe diatuyalaka loko. Etamba tshe wa lʼekunda wadjaki dielu diʼongenongeno 13 La ntundu ka Latuyalaka, ne dia ndi uyayi. Ndi uyayi dia ndjulumbuya kete: Ndi ayulumbuya andja la sambu kʼololo, La antu la mete kandi. |
La Bible en Otetela © Allianee Biblique de la Republique Democratique du Congo, 1991
Bible Society of the Democratic Republic of Congo