Esambu 94 - La Bible en Otetela (Bible K'Ekila) 1991

Dombelo Dia Nsomboya

¹ Latuyalaka li, we keli Unyashungu latosomboyanyaka! We Unyashungu latosomboyanyaka, uyaenya.

² Uneli, we usambudi a wa la kete, Ufuti akanga wʼutaku uku etsha awo.

³ Latuyalaka, edja ndu kaandi ayutshikalaka antu wa kolo? Edja ndu kaandi ayutshikala antu a kolo la wulu?

⁴ Vo watoteketaka oteketateketa, watoteketaka lʼutaku; Atshi wa kolo tshe watuyasemaka.

⁵ We Latuyalaka, vo watatshatshaka antu aye, Watengiyaka wudja aye.

⁶ Vo watuhimbulaka wadi waki edu la angendangenda ete, Watudiakaka ana wa ditshiki.

⁷ Ku watutaka vati: Latuyalaka hadji ashu leko, Unyashungu a Jakoba heti leso.

⁸ Nyu akanga a ngala weli lʼatei wʼantu, nyukani yimba. Nyu dinginya, etena kako kayunyuyala la yimba?

⁹ One lakatungi tui, huka uka? One lakatungi su, hena?

¹⁰ One latetshaka wedja, hatuwangulaka uka? Aha ndi katushaka antu yimba?

¹¹ Latuyalaka atulimbitelaka tukanyi tʼantu ati: Anyanya mbeto.

¹² We Latuyalaka, untu latuyungulaka eko la otshoko, Ndʼako katuyetshaka elembe aye.

¹³ We mbeyaka mbusha ki uma lu nshi ya lutunu lʼutunyi, Edja ndu lamʼayuwutshimela untu a kolo diumbu.

¹⁴ Latuyalaka hatukadjaka antu andi, Ndu hatosekaka wudja andi.

¹⁵ Elumbwelu kayedima pupu la sambu kʼololo, La antu tshe weli la etema wʼusimbwi, wayukietawo.

¹⁶ Ayunela dia ndwelami la antu wa kolo ta? Ayunsukela dia ndo la antu wa kolo ta?

¹⁷ Utunduyala Latuyalaka kunkimanyiami, Tshiki lumu lami lututsho esadi lu ngelu ka ki.

¹⁸ Lamʼakamati nti: Dikaka diami diamboselo, Ngandji kaye ka shikaa akansukela, we Latuyalaka.

¹⁹ Lamʼatufutanaka tukanyi tami, Sambelu diaye diatongenyangenyaka utema ami.

²⁰ Khumi ya dikanga ya kolo watudjaka akambu wa lukesu uma lʼolembe, Mbeyaka mbekesanela la ye uka?

²¹ Vo watusanganaka dia ntshela lumu la untu ololo kolo, Ndu dia ndjaka untu laha la unungu.

²² Latuyalaka keli lungeli lami, Unyashungu ami keli dive diʼeshamelu kami.

²³ Ndi ambukaluya kolo yawo lʼete awo. Ndi ayalanya ne dia ehedia awo, Latuyalaka, Unyashungu asu, ayalanya.