Esambu 90 - La Bible en Otetela (Bible K'Ekila) 1991

BUKU DIA NEI Unyashungu Katuyalaka, Untu Ndjala Nshi Motshi Tshu

¹ We aki edjaselu kasu Lu nonga tshe.

² Ntundu akuna watatungama, Ndu we atatungi kete la andja, Umaka mombokombola, we keli Unyashungu.

³ We atukadimulaka antu ditshu dia kete, Atutaka wati: Nyukaluli, nyu ana wʼantu!

⁴ Ne dia deku kinunu lu ashu aye, Dieli uku lomo unya, Uku djo ya ntundu lʼutshu.

⁵ We atetshaka antu uku elula kʼashi. Vo watuyalaka uku do, Watuyalaka la pindju uku adiyu wʼomongela.

⁶ La pindju, vo watomongaka, watuyalaka ashashi atu. Ku la dikolo, watuhimbwamaka, watolengelaka.

⁷ Shu tambutshumbama la kele kaye, Ndu ududu aye ambutukitsha balakata.

⁸ We atukitshaka ehedia asu la ntundu kaye, Ndu kolo yasu ya lu usheshe lu usasi wʼelundji kaye.

⁹ Nshi yasu tshe yambeta lu kele kaye utu. Shu tatukumiyaka nyumu yasu la dimu dia nyoi.

¹⁰ Nshi ya lumu lasu nkumaka lu deku akumi esambeli, Wane wuleki wulu pulu ndu deku akumi enanei. Keli nshi yawo ndjalaka paka pa la asui. Yo yatushilaka esadi, ku shu nfumbo.

¹¹ Akona ateyaka wulu wa kele kaye, Lu yediko yahumbasu mbuka ududu aye woma?

¹² Utetsha lama mbala nshi yasu, Dia shu ndjala la etema wa yimba.

¹³ We Latuyalaka, etena kakona kayuyukalula? Uki ekambi aye ketshi!

¹⁴ Utulutshaki la ngandji kaye ka shikaa pindju tshe, Dia shu ndjalaka la ongenongeno, la menaka olo nshi yasu tshe.

¹⁵ Utongenyangenya nshi efula uku efula ka nshi yakayatusuyaka, Uku efula ka deku diakatadienaka.

¹⁶ Ulimu aye wenami le ekambi aye, Ndu lutumbu laye le anʼawo.

¹⁷ Ngandji ka mamba ka Khumadiondjo, Unyashungu asu kayali la su. Ushikike ulimu watutukambaka lʼanya! Ee, ushikike ulimu wʼanya asu.