Esambu 9 - La Bible en Otetela (Bible K'Ekila) 1991

Lusaka Ne Dia Sambu kʼOlolo ka Unyashungu

¹ Latuyalaka, dimi layukukaka lusaka lʼutema ami tshe. Dimi layenyaka antu elimu aye tshe wa mamba.

² Dimi layongenangena le ye, layongenangenaka otekoya. Dimi layimbelaka lukumbu laye esambu wa diandu, we Khumʼulungu.

³ Atunyi ami wakakalula ekongokongo, Wakatakana, wakalanyema la ntundu kaye.

⁴ We akashikike dikambu diami ndu ololo ami. We katudjaseka lu kiti ka diulelu asambula akambu wʼololo.

⁵ We mpangwelaka wedja, we nanyaka antu wa kolo. We akadimi kumbu yawo pundju, pundju.

⁶ Atunyi tshe wakashili, elanyelu ka pundju akayala! We akalanya esambu awo, Ndu euhwelu kawo kakashili.

⁷ Keli Latuyalaka ayulelaka pundju; Ndi akalongosola kiti kandi kʼelumbwelu.

⁸ Ndi atulumbuyaka andja tshe la sambu kʼololo; Ndi atolombolaka antu lu yediko yʼusimbwi.

⁹ Latuyalaka eli eshamelu kʼusuyami, Ee, eshamelu kandi lu nshi ya pa.

¹⁰ Wane wateyaka lukumbu laye, watukekamaka, Ne dia we Latuyalaka haseke wane watukuyangaka.

¹¹ Nyimbelaki Latuyalaka ludjashi lu Siona esambu wa diandu, Nyudianganyaki lukumu la etsha andi wʼololo lʼatei wʼantu,

¹² Ne dia one latosomboyaka dikila mbauhoka. Ndi huhela delu dia kanga ndjakitshakitsha.

¹³ Latuyalaka li, umbuki ketshi; Enda sui diamumusuwa uma le wane watumpetshaka! We atumunyiyaka uma lu suku dia nyoi,

¹⁴ Dia dimi nkutumbulaka lu asuku wa dikuna dia Siona. Dimi layongenangenaka lu panda kaye.

¹⁵ Wedja wʼantu watutambelaka lu afuku wakawatshimi. Akaka awo watutalaka lu eshinga wakawambi.

¹⁶ Latuyalaka atuyaenyaka, atalaka dialelu diʼololo. Ndi atundaka untu a kolo lu djunga yakandambi ndame.

¹⁷ Antu wa kolo wayuhulo lu Dihuli diʼEdu Kame la wedja tshe watuhelaka Unyashungu.

¹⁸ Uhumbi huhamela pundju. Elungamelu kʼusi wula hayala uyalayala pundju.

¹⁹ Latuyalaka li, uneli, untu talembiaki! Wedja walumbuyaki la ntundu kaye.

²⁰ Latuyalaka li, uwaukia woma, Wedja weyi vati: Antu wakatungama mbewo!