Esambu 82 - La Bible en Otetela (Bible K'Ekila) 1991

Luhangu lu Dumbwelu Diahasimbo

¹ Unyashungu atemalaka lʼatei wʼantu andi, Lʼatei a ditemolatemola, ndi keli usambudi.

² Edja ndu kaandi ayunyuheko mbala akambu walala, La mbekamaka antu wa kolo?

³ Nyusambwelaki asi wula la ana wa ditshiki la sambu kʼololo, Nyali akambu wʼasuyami la ahumbi la dialelu diʼololo.

⁴ Nyamelaki asi wula la amenyi fono, Nyatshunguli uma lʼanya wʼantu wa kolo.

⁵ Antu ako haweyi, hawumani fundu. Vo watokendakendaka lu udjima. Atshina tshe wa kete wambusutshasutshama.

⁶ Dimi lakati nti: Ditemolatemola mbenyu, Nyu tshe, ana wa KhumʼUlungu mbenyu.

⁷ Keli nyu nyayuvokaka uku antu, Nyayolembiamaka uku atolembiamaka onʼa uwandji.

⁸ Unyashungu li, uneli, ulumbuya wa la kete! Ne dia wedja tshe waye mbewo.