Esambu 79 - La Bible en Otetela (Bible K'Ekila) 1991

Delu ne Dia Elanyelu ka Jerusalema

¹ Unyashungu li, wedja wʼantu wakoto lu kete yakayasonola, Wakafutanya etemwelo kaye kʼekila, Wakahandjula Jerusalema vwa.

² Vo wakakimo edu wʼekambi aye Dia fudu ya lʼulungu mbehatula; La edu wa ekilami aye, Le nyama ya la kete.

³ Vo wakakedia dikila diawo uku ashi Lʼutshimba tshe wa Jerusalema. Nduku untu akiko dia mbakhunde.

⁴ Takayala amonywami le asukanyi asu, Ndu asokami la ambolami le wane wutudingi.

⁵ Latuyalaka li, edja ndu kaandi! We ayumala kele pundju? Kandjema kaye ayoheta uku dja uka?

⁶ Utshulweli wedja wahatukeyaka kele kaye, Ndu waulelu wahatotemolaka lukumbu laye!

⁷ Ne dia vo wakali Jakoba, Wakuhandjwela ngelu.

⁸ Taheki kolo yakatshaka watshesu lʼete asu! Ketshi kaye ka mamba asamanya dia ndjuhumana la su! Ne dia tambutamanya nkitshakitshama.

⁹ We Unyashungu a panda kasu, Utukimanyia dia lukumbu laye ntumbwama. Ututshunguli, Ne dia lukumbu laye, utudimanyia kolo yasu,

¹⁰ Ukundi ayumbula asi wedja vati: Lendʼeli Unyashungu ami? Wedja tshe weli la ntundu kasu weyi vati: We katosomboyaka dikila diʼekambi aye diakatshulwama.

¹¹ Tukuku ta delu tʼasi lukanu tukami le ye! Uma lu lunya laye la wulu, ushimbeli wane wutsha ndjakema!

¹² Khumadiondjo li, uhoki tengo yakakotengaka asukanyi asu, Uwasomboya tena esambeli.

¹³ Ku shu wudja aye, ekoko watuyuleshaka, Tayukukaka lusaka pundju, Tayukandulaka lu lolonga la lolonga.