Esambu 74 - La Bible en Otetela (Bible K'Ekila) 1991

Osengosengo le Unyashungu Dia Nanya Atunyi

¹ Ukundi ambuyutukadja pundju? Ukundi adodo kele kaye uya le ekoko wa lu lukumbu laye?

² Uhoki ului wʼantu aye wakayakundja edjedja, Wakayatshungula dia ndjala wudja wʼukito wʼetshoko aye, Ndu wa Ukungu a Siona, lene atuyudjaseka.

³ Ukuli ekulu, utendi elanyelu ka mamba. Utendi akambu wa kolo wakatshi atunyi lu luudu laye lʼekila.

⁴ Wakakitsha diango diʼotemwelo awo. Lu ahuli waki diango diaye diʼekila.

⁵ Vo wakahandjula etemwelo kaye la tokenge, Uku atokotaka antu ekota.

⁶ Vo wakalanya elimu tshe wakatshama la komba La tokenge tawo lʼehumo awo.

⁷ Vo wambutshumba etemwelo kaye. Vo wakalanya edjaselu kaye, wakakihandjula vwa.

⁸ Vo wakatanela vati: Tulanya temwelo diawo tshe. Ku wakatshumbi temwelo tshe dia Unyashungu lu kete.

⁹ Shu hatuyena diango diatuyalaka lʼetemwelo. Nduku umvutshi weki lʼatei asu, Nduku otoi lʼatei asu leya ekumelu ka dikambu ne.

¹⁰ Unyashungu li, etena kakona kayuheko utunyi nkusula? Utunyi ayonyolaka lukumbu laye pundju?

¹¹ Ukundi atuyushimbaka lunya laye, ee, lunya laye la pami, Ulutundja uma lu tulu, atshumbi udiwu utu.

¹² Unyashungu keli khumʼekanga kami kʼedjedja, Atenyaka wa la kete panda kandi.

¹³ La wulu aye mbakayatanya ashi a waki; We katudiudiaka ete wa nyama ya waki yeli lu ashi a waki.

¹⁴ We katudiudiaka ete wa konde, Ku mbishaka asi esui unatshi.

¹⁵ We katutshimaka teko diʼashi, Katutumaka elula, Katumiaka ndjali ya waki.

¹⁶ Yanyi, yaye mbeyo; ndu utshu, waye mbewo. We kakatungi ngondo la unya.

¹⁷ We kakashikike elelu tshe wa la kete, Kakatungi diye la owo.

¹⁸ We Latuyalaka, uhoki dikambu ne; atunyi wakakonyola, Wudja wa tunginyanginya wakatenge lukumbu laye.

¹⁹ Tukimoki lumu lʼunangimi aye utsha le antu wa kolo, Tuhelaki ului aye wʼamenyi fono pundju.

²⁰ Olemiaki sheki yaye, Ne dia ahuli wa udjima wa la kete wambulula too la akanga a ngala.

²¹ Tetawoki asuyami mbutshama sonyi. Etawo amenyi fono la asi wula ntumbula lukumbu laye.

²² We Unyashungu, uheli, onteketele, Uho uku atukotengaka akanga a dinginya nshi tshe.

²³ Tuhelaki aui wʼatunyi aye, Lufungusu la waku watukoloshaka, latutuwoka nshi tshe.