Esambu 71 - La Bible en Otetela (Bible K'Ekila) 1991

Dombelo diʼUsumbi

¹ Latuyalaka li, we kekamimi. Tetawoki dimi mbutshama sonyi pundju.

² Unshimbeli lʼololo aye, umpandja; Umbukeli, unshimbeli.

³ Uyali dive dia dimi ndjasheka loko pundju; We kakadjanga didjangu dia nshimbelakami. We keli dive diami diʼeshamelu la wumbe ami wa ta.

⁴ We Unyashungu ami, umpandja uma lʼanya wʼantu wa kolo, Ee, uma lʼanya wʼatshi wa kolo la akanga ngala.

⁵ Khumadiondjo, Latuyalaka, we keli elungamelu kami, Dimi latukekamaka umaka dikenda.

⁶ Umaka utema a nyomi, mbakayansukela. We kakantundja uma lʼutema wa nyomi, Dimi layokolamelaka nkutumbulaka.

⁷ Antu efula watambaka dikambu diami; We keli eshamelu kami ka wulu.

⁸ Unyo ami aluli too la lutumbu laye, Nkolemiaki pundju.

⁹ Tunsukulaki lu nshi yami yʼusumbi, Tonsekaki lamʼashila wulu ami.

¹⁰ Atunyi ami watutanelaka dikambu diami, Ndu watudjaka sheki lamʼatuwukungelaka lumu lami,

¹¹ Wata vati: Unyashungu amboseka. Nyuyeli, nyuwundi, ne dia nduku untu ukina leya mbushimbela.

¹² Unyashungu li, tanganaki etali uma le mi. We Unyashungu ami, usamanya dia ndjunkimanyia.

¹³ Uvusha atunyi ami sonyi, wahukusani, Waku walanga ntshelami kolo, wutshami sonyi, wonywami.

¹⁴ Keli dimi layokolamela nkulungamelaka, Layutakutumbulaka tshu.

¹⁵ Dimi layutelaka antu dia sambu kaye kʼololo, Ndu dia panda kaye nshi tshe, Ne dia dimi haleyi mbala efula kayo.

¹⁶ Lu wulu wa Khumadiondjo, Latuyalaka, mbatamengola. Dimi layutelaka antu dia sambu kaye kʼololo ketu.

¹⁷ Unyashungu li, kakambetshaka umaka dikenda, La umaka nshi sho mbakamasanyiaka antu dia akambu aye wa mamba.

¹⁸ Unyashungu li, tonsekaki lamʼayami usumbi la ote aya kasa la ndjui, Edja ndu lambutela wa lolonga lone dia lunya laye la wulu, La wulu aye le untu tshe layutoka.

¹⁹ Unyashungu li, wulu aye la sambu kaye kʼololo nkumaka pulu ladiku diʼulungu. We atutshaka akambu a waki; We Unyashungu, akona eli uku we?

²⁰ We lakatenya toshoko tahangone, Ayutulula ntu; Ayutuntundja ntu uma lʼetei a kete.

²¹ Uhamia lutumbu lami utamanya, Usikiso, unsambi.

²² Unyashungu ami, dimi layukandulaka lʼesambu, Ne dia kolamelu yaye; Dimi layukimbelaka esambu la losese, We lʼEkila la Isariyele.

²³ Dimi layongenangenaka utamanya lamʼayumukimbelaka esambu wa diandu. Ndu utema ami wakayatshungula, wayongenangena.

²⁴ Dimi layutaka dia sambu kaye kʼololo nshi tshe, Ne dia wane watuyangaka ntshelami kolo Wambutshama sonyi, wambuhukusana.