Esambu 7 - La Bible en Otetela (Bible K'Ekila) 1991

Dombelo Dia Nshimbamela

¹ Latuyalaka, Unyashungu ami, lambuyanga eshamelu kami le ye. Unshimbeli uma le wane tshe wayandjeli, ndu untshunguli,

² Vo watukatshatsha utema ami uku tambwe, Ku nduku untu laya dia ndjumamela.

³ Latuyalaka, Unyashungu ami li, naka dimi lakatshi dikambu ne; Naka kolo keko lʼanya ami;

⁴ Naka lakatshela one laha lami dikambu kolo, Ndu naka lakasongwela one lakantuni utunatuna,

⁵ Ku utunyi ayeli utema ami, awundi, Ee, akameli lumu lami la kete, Akhunde lutumbu lami lu ditshu.

⁶ Latuyalaka li, unela la kele kaye, Olo la ududu wʼatunyi ami ta. Unyashungu li, uneli, unkimanyia ne dia weme kakadji olembe wʼelumbwelu!

⁷ Ului wʼantu wakudingi, Umbeli ladiku diawo utsha lu dihuli dia lutumbu.

⁸ Latuyalaka atalaka akambu wʼantu. Latuyalaka li, unyindja uku ololo ami la uluwanyi ami!

⁹ Kolo kʼuntu a kolo kakumi, Keli ukikitsha untu ololo, Ne dia Unyashungu wʼololo katushishimaka tukanyi lʼetema wʼantu.

¹⁰ Engawu kami keko Unyashungu. Ndi atushimbelaka one leli la utema wʼusimbwi.

¹¹ Unyashungu eli usambudi wʼololo. Ee, Unyashungu atuhetshaka kolo la lushi la lushi.

¹² Naka untu a kolo hakadimo, Unyashungu ayudja yombo yandi diesa, Ayolema uta andi, ayukungela.

¹³ Ndi ayolongosola dihumo dia nyoi dikambu diandi, Ayete pitu yandi uku dja.

¹⁴ Enda untu a kolo akatshu diemi dia kolo; Ndi aki la diemi diʼufutanu, Ku ndi akuti kashi.

¹⁵ Ndi akalongosola difuku, akaditshimi ohongo, Ku ndame akako lu difuku diakandatshimi.

¹⁶ Kolo kandi kambukalula lʼote andi, La ngala kandi kambuhulo lu fumu kandi.

¹⁷ Dimi layukaka Latuyalaka lusaka ne dia ololo andi. Dimi layandulaka lukumbu la Latuyalaka, KhumʼUlungu, la esambu.