Esambu 66 - La Bible en Otetela (Bible K'Ekila) 1991

Diandu le Unyashungu ne dia Akambu Andi wa Mamba

¹ Nyu wa la kete tshe, nyudjeli Unyashungu dielu diʼongenongeno.

² Nyuwimbeli, nyutumbuli lukumbu landi, Nyutamanya mbutumbula.

³ Nyuteli Unyashungu nyati: Etsha aye dikambu dia mamba mbewo. Uma lu wuki a wulu aye, Mbayuyukitshakitshaka atunyi la ntundu kaye.

⁴ Wa la kete tshe wakotemole, Wakimbeli esambu wa diandu, Watumbuli lukumbu laye.

⁵ Nyuyi, nyuyendi etsha wa Unyashungu. Etsha andi le antu dikambu dia mamba.

⁶ Ndi akete ashi wʼuduwa mbuka ka wumu; Antu wakateho ndjali lʼekulu. Ku takangenangena lu lukumbu landi.

⁷ La wulu andi mbatundulelaka antu pundju. Ashu andi watenaka wedja tshe; Akanga wʼehedia tawuyasemaki.

⁸ Nyu antu, nyanduli Unyashungu. Delu dia lutumbu landi diukami.

⁹ Ndi atulamaka nyumu yasu, Ndi hetawo akaka asu nselo,

¹⁰ Ne dia we, Unyashungu, atutedikaka, Atututshululaka uku atuwutshululaka fesa lu yandju.

¹¹ We akatudji lu otei, Akatembia wetshu wa wulu.

¹² We aketawo antu ntahamela; Takadienaka lu dja ndu lu ashi. Keli we akatukumia lu dihuli diʼololo.

¹³ Dimi layoto la elambu wa lutshumba lu etemwelo kaye, Layushidiya alaka ami le ye,

¹⁴ Wakati elomo ami, Ee, wakamakulaki lamʼakimi lu fono.

¹⁵ Dimi layukulambulaka elambu wa lutshumba wʼuluwanyi, Ee, waumi wʼekoko watutundjaka edinga wa diendje, Layukulambulaka waumi wa ngombe ndu wa mbudi.

¹⁶ Nyuyi, nyuhukami, nyu wane watukaka Unyashungu woma. Nyusanyia akambu wakandatshela utema ami.

¹⁷ Dimi lakulelela, Lakutumbula la lulimi lami.

¹⁸ Naka layushe kolo lʼutema ami, Ku Unyashungu humbukela.

¹⁹ Mete, Unyashungu atumbukelaka, Atuhukama dombelo diami.

²⁰ Unyashungu lahatutunaka dombelo diami, Lahatunyaka ngandji kandi ka shikaa uma le mi, Atumbwami!