Esambu 65 - La Bible en Otetela (Bible K'Ekila) 1991

Diandu le Unyashungu ne dia Diango Diakandatungi lʼAndja

¹ Unyashungu li, lutumbu lambukukungela lu Siona! Alaka tshe wakalakema le ye wayushidiya.

² Le ye, we tatuka dombelo! Antu tshe wayuya ne dia kolo.

³ Ehimba watutohenyahenyaka wulu. Keli we ayutudimanyia kolo yasu tshe.

⁴ Antu watuyosonolaka, la watuyusukanyaka Dia mbidjase lʼetemwelo kaye, watuyalaka la ongenongeno. Shu tatongenangenelaka ne dia eluwanelu ka luudu laye, Ee, etemwelo kaye kʼekila.

⁵ We Unyashungu a panda kasu, We ayukadimula dombelo diasu la sambu kʼololo. We keli elungamelu ka wane weli lu kuma ya kete, Ndu ka wane weli lu ashi a waki wuleki etali.

⁶ La wulu andi mbatushikikalaka akuna wʼetali. Ee, la wulu andi mbayunduwakelekaka.

⁷ Ndi atolembohayaka dikita dia ashi a waki, Ee, dikita dia asukhu awo, Ndu lufungusu la antu.

⁸ Waku watudjaseka pulu ndu kuma ya la kete, mbukaka tulimbitelu taye woma. We atongenyangenyaka ehutwelu la edjelu ka unya.

⁹ We atengolaka la kete, atuyiloyaka, Ndu we atuyingonyaka. Ndjali ka Unyashungu katululaka too la ashi. Lamʼatuyolongosolaka kete osoku, Mbatuyukukiaka mbu ya nde ya antu.

¹⁰ We atoloyaka dikambo la mvula, Atolamiaka emunda, Atolembiaka kete la mvula, Ndu atongonyaka atikita weli loko.

¹¹ We atotshokolaka tumbatumba la ololo aye, Ee, diango diatongonaka ololo lu ahuli tshe watuyengolaka.

¹² Adiyu wa lʼesui watongonaka efula, La mbu ya nde yatufulanelaka lu akuna tshe.

¹³ Dungalunga diatululanelaka lu esui wʼadiyu wʼomongela, Ndu ekedi tshe watukumbamaka, watufulamaka la mbu ya nde. Antu watimbaka esambu, watudjaka waelu wʼongenongeno.