Esambu 64 - La Bible en Otetela (Bible K'Ekila) 1991

Dombelo Dia Mpanda uma le Atunyi wa lu Usheshe

¹ Unyashungu li, umbukeli lamʼakhumami akhumu. Unamaki uma lu woma wʼatunyi.

² Umbisheki uma lu tuseki tʼantu wa kolo, Ee, uma lu lundju lʼului wʼantu wa kolo.

³ Umbisheki uma le waku watoketemolaka nimi yawo uku yombo ya ta, Watukaka aui awo wa lolengo uku pitu,

⁴ Dia vo ntsheta untu ololo lu usheshe. Vo watuwukaka pitu yako shashimuya, waha la woma.

⁵ Watuyashikikeka lʼesangweyu ka kolo. Vo watudjaka sheki ya mamba tulunga lu usheshe, Wambwana vati: Ayutena na?

⁶ Ayeya mbishula kolo yasu na? Vo watuyangiayangiaka dikambu diuleki kolo, Watutaka vati: Tambudishula. Mete, kanyi yʼuma la tshina diʼutema wʼuntu eli dikambu dia mamba.

⁷ Keli Unyashungu ayatsheta dikhuwa, Diayahumuya shashimuya.

⁸ Ne dia nimi yawo mbayundaela elanyelu. Antu tshe wayuwaena, wayutshindja ete awo.

⁹ Ee, antu tshe wayuka woma, Ku vo wayusanyia akina dia etsha wa Unyashungu. Okone mbayuwukana yimba ololo dia etsha andi.

¹⁰ Antu wʼololo wayongenangenelaka Latuyalaka, Wayuwekama. Akanga wʼetema wʼusimbwi tshe wayutumbwama.