Esambu 60 - La Bible en Otetela (Bible K'Ekila) 1991

Dombelo Dia Nkundja Ekimanyelu ka Nembia Atunyi

¹ Unyashungu li, we ambutuhandjula, ambutudianganya vwa; We ambumala kele, ukaluya wulu asu.

² We ambudidimia kete, ambuyata elonge; Utedia elonge ako ne dia djo yusukasuka.

³ We ambenya wudja aye akambu a wulu, Ambutonosha wanu wa wulu wambutudjuya.

⁴ We akasha wane watukukaka woma dembela, Dia dio menama shikaa.

⁵ Utukeli, utushimbeli la lunya laye la lupami, Dia elangimi aye ntshungwama.

⁶ Unyashungu kamboteketa lu ekila kandi ati: Dimi layongenangena, Layukahanya Shekeme, ndu layukaha Ukidi a Sukota.

⁷ Ngiliyade kami keto; ndu Manase kami keto; Efarayima eli ukumbo wʼote ami; Juda keli danga diami dia diulelu;

⁸ Moaba keli donga diami dia mboka; Ladiku dia Edome kayumukadja sabata yami; Dimi layudja dielu diʼongenongeno ladiku dia Filistiya.

⁹ Akona ayonombola utsha lʼusumba a wulu? Akona ayonombola utsha lʼEdome?

¹⁰ We Unyashungu, we kuntusukuya uka? Mete Unyashungu, we hatshu kame lʼelui asu wʼalimbi.

¹¹ Utukimanyia dia nembia utunyi, Ne dia ekimanyelu kʼuma le antu keli anyanya.

¹² Uma le Unyashungu mbayutuyala andeki wʼutamanya, Ne dia ndi ayukamela atunyi asu la tshina diʼakaka andi.