Esambu 6 - La Bible en Otetela (Bible K'Ekila) 1991

Dombelo Dia Mbukama Ketshi lu Nshi ya Ohenyohenyo

¹ Latuyalaka li, tumpangwelaki lu kele kaye, Tonkomolaki lʼududu aye!

² Latuyalaka li, umbuki ketshi ne dia dimi kema la wulu! We Latuyalaka, onkonoya ne dia weka ami wambusaka lukumba.

³ Ndu utema ami tshe wambukanana, We Latuyalaka, edja ndu kaandi?

⁴ Ukaluli, Latuyalaka li, utshunguli utema ami, Unshimbeli uma lu ketshi kaye,

⁵ Ne dia one lambuvo Kema lʼeuhwelu kaye! Untu akona ayukandula lamʼendi lu diumbu?

⁶ Dimi lambokomo la delu; Etshu tshe, mbetu kami katutehaka lu asoi ami; Tangi kami katolowaka la alelu ami.

⁷ Ashu ami wambuyala enguli la delu; Atunyi ami wambuwaete esumbi.

⁸ Nyumanganeli, nyu tshe watutshaka kolo. Ne dia Latuyalaka ambuka kuku ya delu diami.

⁹ Latuyalaka ambuka osengosengo ami; Ndi ayetawo dombelo diami.

¹⁰ Atunyi ami tshe wayutshama sonyi ndu wayukanana; Vo wayusikiso, wayolombo la sonyi shashimuya.