Esambu 59 - La Bible en Otetela (Bible K'Ekila) 1991

Dombelo Dia Ntshungwama Uma le Atunyi

¹ Untshunguli uma le atunyi ami, we Unyashungu ami. Umpandja uma le wane watulangaka dia ndo la mi.

² Untshunguli uma le atshi wa kolo, Untshunguli uma le tomboki.

³ Enda, vo watuhulamelaka lumu lami. Akanga a wulu watusanganaka dia ntshelami kolo. Keli aha ne dia uhedia ami, kuyanga kolo kami, we Latuyalaka,

⁴ Aha ne dia munga kami mbatuyalongosolaka dia ntshelami kolo. Emo, uyi dia ndjukimanyia, uyendi!

⁵ Latuyalaka, we Unyashungu Kanga lulimbilimbi, we keli Unyashungu wa Isariyele. Uneli dia ndjusuya wedja tshe. Tusambwelaki nduku otoi a wane watutshaka kolo.

⁶ Vo watukalulaka la dikolo, watudaka engumba uku fo, Watutshimbaka usumba.

⁷ Vo watutaka aui wa lotengo, Tombo teko lʼelomo awo, Ne dia vo watumbwanaka vati: Uka akambu watasu na?

⁸ Keli we Latuyalaka ayuwaola, Ee, we ayonyola wedja tshe.

⁹ We Wulu ami, dimi layukimbelaka esambu wa diandu, Ne dia we Unyashungu, keli wumbe ami wa ta.

¹⁰ Unyashungu ami ayuhumana la mi la ngandji kandi ka shikaa. Unyashungu ami ayomenya elembielo kalangami le atunyi ami.

¹¹ Tadiakaki, asikami watukuhela dikambu ne; Adianganya la wulu aye, akitshakitsha, We Unyashungu, engawu kasu.

¹² Kolo keko lʼenyo awo, lu aui wa kolo lʼelomo awo. Okone wandami lu utaku awo, Ndu lu aui wa dionyo la wa kashi watuwutaka.

¹³ Amani tu lu kele kaye, ashili ushiki! Vo weyi vati: Unyashungu katulelaka Jakoba Pulu ndu lu kuma ya kete.

¹⁴ Vo watukalulaka la dikolo, watudaka engumba uku fo, Watutshimbaka usumba.

¹⁵ Vo watetetaka lu dihuli la dihuli lu ntayangi ma, Watuhutuyaka hutu, ku hawuluti.

¹⁶ Keli dimi layukimbelaka esambu ne dia wulu aye, Layukandulaka la pindju la esambu, ne dia ngandji kaye ka shikaa; Ne dia le ye kendami, We keli eshamelu kami lu nshi ya pa.

¹⁷ We Wulu ami, dimi layukimbelaka esambu wa diandu, Ne dia we Unyashungu, keli wumbe ami wa ta, Unyashungu latomenyaka ngandji ka shikaa.