Esambu 55 - La Bible en Otetela (Bible K'Ekila) 1991

Dombelo Dia Akanga wʼUkadi Nanyema

¹ Unyashungu li, uhukami dombelo diami, Tuyasheki lamʼakalombami,

² Umbukeli, unkaluya diui. Dimi lambuhasahasa lu pa kami, Lambukiyana,

³ Ne dia diui diʼutunyi ami, ndu ne dia asui wʼuma le antu wa kolo; Ne dia vo watuntshelaka kolo, Watumpetshaka, watunsuyaka.

⁴ Utema ami atuyalaka la lokonyo, La woma wa nyoi watumundaka,

⁵ Woma la lukumba wambumunda. Dimi lambukuka woma utamanya.

⁶ Ku dimi lakati nti: Utumuyala la ahafu uku inga li, Tshiki lutufumbo la ntumuya;

⁷ Tshiki lutekeko etali, Lutudjase lʼusui;

⁸ Tshiki lutusamanya dia mpanda Uma lu lopepe la mamba ndu ngimbi!

⁹ Khumadiondjo li, ulanya antu ako, atshatsha nimi yawo, Ne dia dimi latenaka akambu wa ngala ndu wʼufutanu lʼusumba.

¹⁰ Vo watetetaka ladiku dia lukumbu lawo, ndu la yanyi ndu lʼutshu. Kolo la lukesu latenamaka lʼatei awo.

¹¹ Kolo yatuyalaka lʼatei awo, Ehotwelo la Iukesu hawumoka uma lʼesese awo.

¹² Utunduyala utunyi akansuya, Tshiki dimi lutolembohala; Utunduyala utunyi ami akayaseme dia ndo la mi, Tshiki dimi lutuwushama.

¹³ Keli dikambu ne dieli uma le ye, we untu ledimi la mi, We umbekesanedi ami, ndu ongenyi ami.

¹⁴ Shu takalakanaka, Takakendakendaka lu luudu la Unyashungu lu ekesanelu.

¹⁵ Nyoi awandi shashimuya, Wahulo esenyu utsha lu Dihuli diʼEdu. Vo wamo lu woma wa mamba utsha lu waumbu awo.

¹⁶ Keli dimi layotemolaka Unyashungu, Ku Latuyalaka ayunshimbela.

¹⁷ Dimi layukiyanaka, layukhumaka akhumu yanyi tshe, Ku ndi ayumbukela.

¹⁸ Ndi ayutshungula lumu lami uma lu ta diatuwolokaka la mi, ku ndi ayumbisha ki, Ne dia wane watolokaka la mi weko efula.

¹⁹ Unyashungu ayuka, ayakitshakitsha, Ee, one latuyalaka pundju pundju, ayudjaseka lu kiti kandi ka diulelu. Vo hawukadimo, Hawuki Unyashungu woma.

²⁰ One latunyiyaka anya andi dia ndo la wane waha la ndi dikambu, Ambulanya daka diandi.

²¹ Lulimi landi laki oselo uku iso, Keli ta diaki lʼutema. Aui andi ndeka iso oselo, Keli tombo ta diesa mbakiwo.

²² Ukitsha wutshu aye le Latuyalaka, Ku ndi ayukembelawo. Ndi hetawo untu ololo nsutshasutshama.

²³ Keli we Unyashungu ayahuluya utsha lʼesi lu difuku dia kʼesi. Atomboki la akesanyi, Hawulumbi edja, paka yema tshu. Keli dimi layukekamaka.