Esambu 52 - La Bible en Otetela (Bible K'Ekila) 1991

Ndjasema lu Kolo Eko Anyanya

¹ We kanga khudu ukundi atuyuyasemaka lu munga kakayatshela untu ololo? Nshi tshe mbatuyusanguyaka elanyelu.

² Lulimi laye leko diesa uku luhayu, We kanga ukadi.

³ We atulangaka kolo uleki ololo, La mvuta kashi uleki mvuta akambu wʼusimbwi.

⁴ We atulangaka aui tshe wa nshila antu, La lulimi lʼukadi.

⁵ Ukuku mbayukulanya Unyashungu pundju, Ndi ayukunda, Ku ayukutundja uma lu luudu laye la dipema, Ayukunyia uma lu kete ya wa sena.

⁶ Ndu antu wʼololo wayena dikambu diako, Wayuka woma, wayosoka vati:

⁷ Enda, untu one kombekama le Unyashungu, Keli akekama lʼefula kʼongonyi andi. Ndi akayakikitsha lu kolo kandi.

⁸ Keli dimi latuyalaka uku utamba wʼuweli, Weli la akatshi wa tshududu lu seke dia luudu la Unyashungu. Dimi latekamaka lu ngandji ka mamba ka Unyashungu pundju, pundju.

⁹ Dimi layukutumbulaka pundju, Ne dia we ambutsha dikambu ne. Elungamelu kami keko lu lukumbu laye, Ne dia lo leli ololo Lu ashu wʼekilami aye.