Esambu 50 - La Bible en Otetela (Bible K'Ekila) 1991

Unyashungu Usambudi

¹ Latuyalaka, Unyashungu, Kanga-Wulu, kateketa, atetaka kete Uma lʼehutwelu ka unya pulu ndu lʼedjelu kawo.

² Unyashungu atohetaka ngaingai Uma lu Siona, dimena otekoya.

³ Unyashungu tuyakaka, hatutshikalaka ki. Dja yatohetaka la ntundu kandi, Lʼutshimba andi tshe, atuyalaka uku ngimbi ka wulu.

⁴ Ndi atetaka wa lʼulungu Ndu wa la kete, dia numbuya wudja andi.

⁵ Usanganyia ekilami ami kame, Waku wakadji la mi sheki yʼulambu wa lutshumba.

⁶ Wa lʼulungu wayusanyaka sambu kandi kʼololo, Ne dia Unyashungu ndame keli usambudi.

⁷ Nyu wudja ami, nyulungi, keli ntekete. Isariyele li, dimi layukulimbitshiya: Dimi Unyashungu, keli Unyashungu aye!

⁸ Dimi hakutshumula ne dia elambu aye, Elambu aye wa lutshumba watuyalaka la ntundu kami tena tshe.

⁹ Dimi halosa osongo a ngombe uma lu luudu laye. Kuyanga waumi wa mbudi uma lʼekutu aye,

¹⁰ Ne dia nyama tshe ya lʼukunda yeli yami, La ngombe yeli lu akuna kinunu.

¹¹ Dimi latulimbitelaka fudu tshe ya lʼulungu; Ndu tshe yatetetaka lʼusui, yami mbeyo.

¹² Utunduyala dimi mbuki ndjala, tshiki dimi kunkutela, Ne dia andja tshe weli wami, ndu diango tshe dieli loko.

¹³ Emunyi a waumi wa ngombe mbatumolekaka? Kana dikila dia mbudi mbatumonokaka?

¹⁴ Nyulambuli Unyashungu elambu wʼeukelu ka lusaka, Nyushidiya alaka anyu le KhumʼUlungu.

¹⁵ Kumbeti lu lushi laye la pa. Dimi layukutshungula, ku we ayuntumbula.

¹⁶ Keli Unyashungu atutelaka untu a kolo ati: Ukundi atuyudimulaka elembe ami? Ukundi atuyudjaka daka diami lʼunyo?

¹⁷ We katuhetshaka wetshelu ami, Ndu katukadjaka aui ami lʼokongo.

¹⁸ Lamʼatuyenaka uvi, we atongenangenaka kame la ndi; We atekesanelaka kame la akanga a luseka.

¹⁹ We atukimoka unyo aye lu kolo, Ndu lulimi laye latutaka akambu wa nyimbiya.

²⁰ We atudjaseka, atosongwelaka onanyo, Atotengaka ona pami lakuti nyo.

²¹ Akambu aso mbakayatshaka, ku dimi lakatshikalaka ki. We akakanaka yimba wati: Dimi pupu la ye. Keli dimi luyanga nkuhangwela, layukitsha dikambu ne la ntundu kaye.

²² Kakiane nyendi ololo, nyu wane watuhelaka Unyashungu. Dimi tukunyatshatsha betshi betshi, ku nduku untu layunvutshungula.

²³ One latukimoka ulambu wʼeukelu ka lusaka, latumandulaka, Ndu latuluwanyaka lokendo landi, Dimi layuwenya panda ka Unyashungu.