Esambu 49 - La Bible en Otetela (Bible K'Ekila) 1991

Enginya ka Mbekama lu Ekundji

¹ Nyu antu tshe, nyulungi dikambu ne; Nyu wa la kete tshe, nyuhuke tui,

² Wa tshitshe ndu wa waki, Akanga wʼengonyi ndu asi wula.

³ Unyo ami utsha mvuta aui wa yimba, Ndu utema ami ambulula too la bewu.

⁴ Dimi layuhuke tui lu wela, Layukadimula yukedi yami lu losese.

⁵ Ukundi ukami woma lu nshi ya kolo, Lamʼatunyingaka kolo kʼatunyi ami?

⁶ Vo watekamaka lʼekundji awo, Ndu watuyasemaka dia efula kʼengonyi awo.

⁷ Nduku otoi lʼatei awo leya ntshungula unyandi, Kuyanga mbisha Unyashungu ushinga wʼetshungwelu.

⁸ Etshungwelu kʼetema awo keko ushinga a wulu, To hakieyi nkuka pundju,

⁹ Dia ndi numba pundju, La diaha ndi mena Difuku.

¹⁰ Mete, ndi ayudiena, ne dia akanga a tumba mvokaka; Enginya la kanga ngala watuvokaka pupu, Ku watutshikelaka akina ekundji awo.

¹¹ Vo watulekaka nkana dia khumbu yawo ntshikala pundju, Dia adjaselu awo ntshikala lu lolonga la lolonga. Vo watoleka kete yawo kumbu yawo.

¹² Kuyanga untu la nemo, ndi hatshikala pundju. Ndi ayuvo uku atuvokaka nyama.

¹³ Osoku mbeli mbuka kawo vo akanga a dinginya. Keli wane watayelaka, watongenangenaka la aui awo.

¹⁴ Vo wambosonwama utsha lu Dihuli diʼEdu, Uku ului wʼekoko utsha lu dihuli diʼediakelu, Nyoi ayuyala ulami awo. Vo wayuhulo pulu utsha lu diumbu; alimba awo wayohonda. Dihuli diʼEdu diayuyala ngelu kawo.

¹⁵ Keli Unyashungu ayutshungula utema ami uma lu wulu wa Dihuli diʼEdu, Ne dia ndi ayombosa.

¹⁶ Tukaki woma lamʼayongona untu, Kana lamʼayufulanela ekundji wa lu luudu landi,

¹⁷ Ne dia lamʼayunduvo, ndi hotola nduku engo; Ndu lutumbu landi haleyi mbuyela.

¹⁸ Kuyanga ndi atongenyangenyaka utema andi lamʼekindi la lumu, La antu watuwandulaka anyanya lamʼatunduyangenyangenyaka,

¹⁹ Ndi ayutsho utsha le washi, Wahenaki usasi pundju.

²⁰ Untu leli la nemo ku hayalimbitela, Ayuvo uku atuvokaka nyama.