Esambu 45 - La Bible en Otetela (Bible K'Ekila) 1991

Usambu wa Tshuki Dia Khumʼekanga

¹ Dikambu dimotshi diʼololo diambulula lʼutema ami. Dimi luyanga nteketa akambu wakamalongosola dikambu dia khumʼekanga. Lulimi lami leli uku lukala lʼufundji wʼololo.

² We kuleki ana apami wʼantu dimena. Ngandji ka mamba keko lʼelomo aye, Diako mbakakotshokola Unyashungu pundju.

³ We pami ka wulu, osome yombo yaye lʼuya, Olote elengalenga kaye la lutumbu laye.

⁴ Lu lutumbu laye, uyali undeki wʼutamanya, Lu akambu wa mete, ndjakitshakitsha, la sambu kʼololo. Lunya laye la pami layuketsha akambu wa ngala.

⁵ Pitu yaye yeko sodi efula; Yo yatutshetaka etema wʼatunyi wa khumʼekanga. Ku vo watokokaka la tshina diaye.

⁶ Kiti kaye ka diulelu keli uma le Unyashungu pundju, pundju. Danga dia diulelu diaye, dieli danga dia sambu kʼololo.

⁷ We atulangaka sambu kʼololo, atuhetshaka kolo, Diako mbakakukiti Unyashungu aye iso, Ee, iso kʼongenongeno kuleki kʼasikaye.

⁸ Ahondo aye tshe weko la upumu wʼololo wa malashi. Dihumelu dia sese diatukongenyangenyaka lu mvudu ya diulelu.

⁹ Ana amantu wa khumi ya dikanga weko lʼului wa amantu aye wa lukumu. Wadeye atuyalaka lu lunya laye la lupami, uyalengi la paunyi kʼuma lʼOfira.

¹⁰ Ona umuntu, endi, uhuki tui, Uheli wudja aye ndu luudu la sho.

¹¹ Osoku mbayongenangena khumʼekanga dimena diaye; Ne dia ndi keli khumeye, olemiaki.

¹² Ona umuntu a la Tura la ushasha andi, Kame la akanga wʼongonyi wuleki wa lu wudja, wayuyanga etshoko uma le ye.

¹³ Ona umuntu a khumʼekanga atuyalaka la lutumbu tshe lʼatei a luudu la shi. Ekutu andi wakatelama la eshinga wa paunyi.

¹⁴ Ndi ayolombama utsha le khumʼekanga, Olotshi ekutu andi weli la alangi a wehu wehu, Ndu esekaseka wʼantu watekesanelaka la ndi, watuyeli, wayolombwama la ntundu kaye.

¹⁵ Vo wayolombwama lʼongenongeno otekoya, Wayoto lu luudu la khumʼekanga.

¹⁶ Anʼaye wayosa ahuli a washo; We ayuwadja ewandji lu kete tshe.

¹⁷ Dimi layuhulaka nonga tshe lukumbu laye. Ku antu wayukandulaka pundju, pundju.