Esambu 44 - La Bible en Otetela (Bible K'Ekila) 1991

Tshungwelu Dia Nshi ya Ntundu la Ehenyohenyo wa Nshi Nye

¹ We Unyashungu, shu takuki lʼatui asu, Ee, washesu wakatutelaka Akambu wakayatshaka lu nshi yawo yʼedjedja.

² We akatshanya wedja la lunya laye dia mbasekola, Akasuya antu dia mbadianganya lu ahuli akina.

³ Washesu konembia kete la wulu wa yombo yawo, Ndu vo kunshimbamela la wulu awo vame. Keli uma lu lunya laye la pami la usasi wʼelundji kaye, Ne dia we akawaukaka ngandji.

⁴ Unyashungu, we keli khumʼekanga kami, Uti diui dia ntshungula Jakoba.

⁵ Kame la ye, mbayutolembia atunyi asu, Kame la lukumbu laye, mbayutukamela wane watututshelaka kolo.

⁶ Dimi halekama uta ami, Kana yombo yami, dia nshimbamela.

⁷ We kakatushimbela uma le atunyi asu, Kakafutanya wane watutuhetshaka.

⁸ Lutumbu lasu leko le ye, we Unyashungu, Tayandulaka lukumbu laye pundju.

⁹ Keli we akatusukula, akatukia sonyi, Ndu we hayutsho kame lʼelui asu wʼalimbi ntu.

¹⁰ We atutukaluyaka ekongokongo la ntundu kʼutunyi asu, Atutulawuyaka la ntundu kʼutunyi. Ku waku watutuhetshaka, watutohotolaka diango diasu.

¹¹ We ambutukimo le wo uku ekoko dia ndjala unatshi awo, Ambutuhandjula lʼatei a wedja tshe.

¹² We ambusundja wudja aye usundjasundja Lʼushinga wa lʼesi, wahakusha waho wʼololo.

¹³ We ambutete engo ka dionyo le asukanyi asu, Engo Ka losoko la ka tola le wane wutudingi.

¹⁴ We ambutete engo ka lotengo lʼatei a wedja, Engo kʼantu nyinginyaka ete la losoko.

¹⁵ Dionyo diatuyalaka la ntundu kami nshi tshe, La sonyi katukumbaka elundji kami,

¹⁶ Uma lu aui wa one latomengaka diengekhu ndu latontengaka La ntundu kʼutunyi la osomboyishi.

¹⁷ Akambu ane tshe wambuyala le su, Keli shu tatakuhela, Tatakukesi lu sheki yaye.

¹⁸ Etema asu watamo uma le ye, Ndu ekulu asu watetola uma lu mbuka kaye,

¹⁹ Dia we tutatshatshaki lu ahuli watetamaka mbulu, La ntukumba la udjima a nyoi.

²⁰ Naka shu takuhela lukumbu la Unyashungu asu, Kana shu takasimbula anya asu utsha le etemolatemola kemotshi,

²¹ Unyashungu leya akambu wa usheshe wa lʼetema, Ndi tuteya dikambu so uka?

²² Keli lu dikambu diaye, mbatutudiakemaka nshi tshe, Mbatutalemaka uku ekoko wakawasonola dia mbadiaka.

²³ Khumadiondjo, eto, ukundi alalaye djo? Eto, tutusukulaki pundju.

²⁴ Ukundi asheye elundji kaye? Ukundi uhelaye fono kasu la ohenyohenyo asu?

²⁵ Etema asu wambolembiama lu ditshu, Alimba asu wambumamatana la kete.

²⁶ Uneli, utukimanyia. Lu ngandji kaye ka shikaa, ututshunguli.