Esambu 37 - La Bible en Otetela (Bible K'Ekila) 1991

Antu wa Kolo Kema la Eku

¹ Tuyatshumuyaki ne dia atshi wa kolo, Tukaki wane watutshaka kolo kandjema.

² Vo wayuhimbwama esadi uku adiyu, Wayolengela uku adiyu wʼeyuyu.

³ Ekamaki Latuyalaka, utshaki ololo, Ku we ayudjase la kete, ayulutshama uma lu kolamelu yandi.

⁴ Ndu ongenangenaki le Latuyalaka, Ku ndi ayukusha kene kalanga utema aye.

⁵ Uyakimo le Latuyalaka, ekamaki le ndi, Ku ndi ayukutshela dikambu diako.

⁶ Ndi ayudianganya sambu kaye kʼololo uku usasi, La ololo aye uku yanyi ya midi.

⁷ Uyalaki ki la ntundu ka Latuyalaka, ukungaki la Kolamelu. Tuyatshumuyaki ne dia one latuhumoka lukulu lʼolo lu mbuka yandi, Latushidiyaka sangweyu diandi dia kolo.

⁸ Ukimo kele, oseke yenyi. Tuyatshumuyaki, ne dia tshumu ntolaka untu utsha lu kolo.

⁹ Atshi wa kolo wayuhimbwama, Keli wane watulungamelaka Latuyalaka wayukita kete.

¹⁰ Etenyi ka tshitshe ketu, kʼuntu a kolo hatanema ntu. Kuyanga ayushishima lu dihuli diandi, ndi henama ntu.

¹¹ Keli akanga a memakana wayukita kete, Ndu wayongenangena la etshoko efula wa ki.

¹² Untu a kolo atusanguyaka dia ntshela untu ololo kolo, Atokeketanyiaka anyu.

¹³ Keli Latuyalaka ayola untu a kolo, Ne dia ndi menaka ati: Lushi landi laya suki.

¹⁴ Antu wa kolo wambosomola tombo tawo, Wambolema eta awo, Dia nembia amenyi fono la asi wula, La dia ndjaka wane watokendakendaka lu mbuka kʼololo.

¹⁵ Tombo tawo tayutundula etema awo, La eta awo wayowelama.

¹⁶ Diango tshitshe diʼuntu ololo Ndeka diango efula diʼantu wa kolo ololo.

¹⁷ Anya wʼantu wa kolo wayowele, Keli Latuyalaka atusukelaka antu wʼololo.

¹⁸ Latuyalaka mbeyaka nshi yʼantu wʼololo: Ukito awo ayutshikala pundju.

¹⁹ Vo hawutshama sonyi lu nshi ya pa, Ndu lu nshi ya ndjala ka kasha, vo wayulutshama.

²⁰ Keli antu wa kolo wayushisho, Atunyi wa Latuyalaka wayuyala uku wata wʼesongo wʼekoko, Wayulungula, wayushisho uku dinga.

²¹ Untu a kolo atosombaka, keli hatosombolaka. Keli untu ololo atutshelaka antu la ketshi, atukahaka.

²² Wane wambotshokwama le Latuyalaka, wayukita kete. Keli waku watudjamaka mananu le ndi, wayunyema.

²³ Latuyalaka atuluwanyaka lokendo lʼuntu ololo, Atongenangenaka mbuka kandi.

²⁴ Kuyanga ndi ayoko, ndi hakomama wulu, Ne dia Latuyalaka atukimelaka lu lunya.

²⁵ Dimi laki olongo a pami, ku laya usumbi, Keli latenyi untu ololo asekama, Kuyanga anʼandi walomba ma.

²⁶ Ndi atukimoka diango la lukahu la mamba, atosondjanyaka; Anʼandi watuyalaka atshokwami.

²⁷ Umo uma lu kolo, utshaki ololo. Osoku mbayuyudjase pundju.

²⁸ Latuyalaka atulangaka sambu kʼololo. Ndi hatosekaka ekilami andi. Antu wʼololo watulamemaka pundju, Keli ana wʼantu wa kolo wayunyema.

²⁹ Antu wʼololo wayukita kete, Wayudjaseka loko pundju.

³⁰ Unyo wʼuntu ololo watutaka aui wa yimba, Ndu lulimi landi latutaka akambu wʼusimbwi.

³¹ Elembe wa Unyashungu watuyalaka lʼutema andi; Akaka andi hawutoseloka.

³² Untu a kolo atotongaka untu ololo, Atuyangaka dia mbudiaka,

³³ Keli Latuyalaka hutshiki lʼanya andi, Kuyanga mbamia lamʼendi lʼelumbwelu.

³⁴ Ulungamelaki Latuyalaka, okolamelaki lu mbuka kandi; Ndi ayukumiya dia we nkita kete. We ayena lamʼayunyema antu wa kolo.

³⁵ Dimi lakenyi untu a kolo laki la wulu efula, Ndi akahakakala uku usasi wa Lebanona.

³⁶ Dimi laketi ntu laawo, lakendi, keli ndi takiko ntu. Kuyanga dimi lakuyangi, keli kumbutana.

³⁷ Udjaki ashu le untu laha la unungu, endaki untu lʼusimbwi, Ne dia ekumelu ka kanga ki eli ongenongeno.

³⁸ Keli atshi wa kolo wayulanyema kame. Tukanula tʼantu wa kolo wayunyema.

³⁹ Keli panda kʼantu wʼololo keko uma le Latuyalaka, Ndi keli usuko awo lu nshi ya pa.

⁴⁰ Latuyalaka atakimanyiaka, atatshungulaka; Ndi atatshungulaka uma le antu wa kolo, atashimbelaka, Ne dia vo watuyangaka eshamelu kawo le ndi.