Esambu 34 - La Bible en Otetela (Bible K'Ekila) 1991

Diandu ne Dia Etshungwelu Uma lʼAsui

¹ Dimi layutumbulaka Latuyalaka tena tshe. Diandu diandi diayuyalaka lʼunyo ami la lushi la lushi.

² Utema ami atuyandulaka le Latuyalaka, Amenyi fono wukaki, wangenangenaki.

³ Nyolemiaki Latuyalaka kame la mi, Shu tshe tediaki lukumbu landi kame.

⁴ Dimi lakayangi Latuyalaka, ku ndi akambetawo, Akantshungula uma lu weoma ami tshe.

⁵ Vo wakawendi, wakayala ngaingai la ongenongeno. Dundji diawo hadiutshama sonyi pundju.

⁶ Usi wula one akaleli, ku Latuyalaka akawukela, Akushimbela uma lʼasui andi tshe.

⁷ Ondjelo wa Latuyalaka atudingaka wane watuwukaka woma, Atashimbelaka.

⁸ Nyunganeli, nyenyi nyati: Latuyalaka eli ololo! Untu latuyangaka eshamelu kandi le ndi, keli la ongenongeno.

⁹ Nyukaki Latuyalaka woma, nyu ekilami andi, Ne dia wane watuwukaka woma, hawutuhumbaka engo.

¹⁰ Ana wa tambwe watuyalaka la ehumba, watukaka ndjala. Keli waku watuyangaka Latuyalaka, hawutuhumbaka engo kʼololo.

¹¹ Nyuyi, nyu ana wa tshitshe, nyumbukeli, Ku layunyetshaka woma wa Latuyalaka.

¹² Untu akona atulangaka lumu? Atulangaka nshi efula dia ndi menaka olo?

¹³ Ushimbaki lulimi laye uma lu kolo, Ndu elomo aye uma lʼaui wa lukesu.

¹⁴ Umo uma lu kolo, utshaki ololo, Uyangi ki, ukiyeli.

¹⁵ Ashu wa Latuyalaka weko le antu wʼololo, La atui andi weko hwe lu alelu awo.

¹⁶ Keli elundji ka Latuyalaka atumoka uma le atshi wa kolo, Dia minya euhwelu kawo la kete.

¹⁷ Antu wʼololo watulelaka, ku Latuyalaka atukaka; Atatshungula uma lʼasui awo tshe.

¹⁸ Latuyalaka eko lasuki la wane weli la etema wambate. Ndi atushimbelaka waku weli la etema wa ndjakitshakitsha.

¹⁹ Asui wʼuntu lʼololo watuyalaka efula, Keli Latuyalaka atutshungulaka uma loko nshi tshe.

²⁰ Ndi atulamaka weka andi tshe, Nduku otoi ambowele.

²¹ Akambu wa kolo wayudiaka untu a kolo, Ndu waku watuhetshaka untu ololo, wayanyema.

²² Latuyalaka atushimbelaka etema wʼekambi andi. Nduku otoi ayanyema lʼatei a wane watuyangaka eshamelu le ndi.