Esambu 32 - La Bible en Otetela (Bible K'Ekila) 1991

Otshoko wa Edimanyelu

¹ Untu lukanga uhedia wambudimanyema, lukanga kolo kambukumbama eli ia otshoko,

² Umu laha la unungu la ntundu ka Latuyalaka, Ndu iana la lukesu lʼutema andi, eli la otshoko.

³ Lamʼakimi kumvuta kolo kami, dimba diami diakatakitakitaka, Ne dia akhumu wakamakhumaka yanyi tshe.

⁴ Lunya laye laki wutshu ladiku diami ndu la yanyi ndu lʼutshu, Wulu ami wakashili uku atumaka ashi lʼowo.

⁵ Dimi lakashula munga kami le ye. Dimi kumbishe kolo kami. Dimi lakati nti: Layushula ehedia ami le Latuyalaka. Ku we akanyimanyiya munga kami.

⁶ Okone untu ololo tshe akolombaki lʼetena kukukiye ntanema. Ku lamʼayululanela ashi a waki, vo hawukumi le ndi.

⁷ We keli eshamelu kami, we ayumumbaka uma lu pa, Ayunyinga la kimbu yʼetshungwelu.

⁸ Ku Latuyalaka ati: Dimi layuketshaka ndu layukenyaka mbuka ka we nkendakenda, Dimi layukulakaka, layukendaka.

⁹ Tuyalaki uku falasa kana uku punda kaha la yimba. Vo watuyisikisulaka lʼekodi wukelekami lʼete ndu lʼenyo, Ne dia yo yatukusukana le ye.

¹⁰ Nyangu efula yatuyalaka le untu a kolo, Keli one latekamaka le Latuyalaka, atudingamaka la ngandji ka shikaa.

¹¹ Nyongenangenaki le Latuyalaka, nyuyali la ongenongeno utamanya nyu antu wʼololo. Nyuhangohango lʼongenongeno nyu tshe akanga wʼetema wʼusimbwi.