Esambu 30 - La Bible en Otetela (Bible K'Ekila) 1991

Eukelu ka Lusaka ne Dia Ehandelu kʼUma lu Nyoi

¹ Dimi layukumbiyaka, we Latuyalaka, ne dia we akambedia! We kunanga atunyi ami ngenagena ladiku diami.

² We Latuyalaka, Unyashungu ami, Dimi lakakulelela, ku we akankonoya!

³ Latuyalaka li, we akatundja utema ami uma lu Dihuli diʼEdu! We akambulula uma lʼatei a waku watuhuloka utsha lu Difuku.

⁴ Nyimbeli Latuyalaka esambu wa diandu, nyu ekilami andi; Nyuwuki lusaka, ne dia euhwelu kandi kʼekila.

⁵ Kele kandi keko tshinyitinyi, Keli etshoko andi watutshikalaka nshi ya lumu tshe. Kuyanga delu diayuyala la dikolo, Ku la pindju ayuyala ongenongeno.

⁶ Dimi lakati lʼatei ongonyi ami nti; Dimi hasukasuka;

⁷ Latuyalaka li, uma lʼololo aye mbakayanshikike wulu uku dikuna! We akashe elundji kaye, Ku dimi lakakanana.

⁸ Dimi lakakulelela, we Latuyalaka! Dimi lakasengasenga Latuyalaka nti:

⁹ Waho akona wayuyukundja lu nyoi kami, Naka lambuhulo utsha lu Difuku? Undi, ditshu mbeyaka nkandula? Dio mbeyaka nsanya kolamelu yaye?

¹⁰ Umbukeli, we Latuyalaka, umbuki ketshi; Latuyalaka li, unkimanyia!

¹¹ We akakadimula delu diami ongenongeno, We akakulula ahondo ami wʼutanda, akandotsha ahondo wʼongenongeno,

¹² Dia utema ami nkimbelaka esambu aha ntshikala ki. We Latuyalaka, Unyashungu ami, dimi layukukaka lusaka pundju.