Esambu 28 - La Bible en Otetela (Bible K'Ekila) 1991

Dombelo Dia Nkundja Ekimanyelu, Ndu Dia Nkimo Diandu ne Dia Unyashungu Ambukaluya Diui

¹ Latuyalaka li, we katumulelelaka! We dive diami, tuyalaki kanga luhuki le mi, Ne dia naka we ayukunga, aha nkaluya diui, Dimi mbeyaka ndjala uku wane watuhuloka utsha lu Difuku.

² Uki aui ami wʼosengosengo lamʼatumukulelelaka, Lamʼatumemeka anya ami utsha lu dihuli diaye diuleki ekila.

³ Tontolaki kame la antu wa kolo, ndu kame la akanga wʼesihi, Watusawulaka la asukanyi awo aui wʼololo wa ki Lamʼewo la ukunda lʼetema.

⁴ Atsheli uku elimu awo, Ndu uku ditshelu diawo diʼukunda. Afuti uku elimu wʼanya awo, Uwasha difutu diedimi la etsha awo,

⁵ Ne dia vo hawutukanaka yimba lʼelimu wa Latuyalaka, Kuyanga lʼulimu wʼanya andi. Ndi ayuwamba, keli huwaunyiya ntu.

⁶ Latuyalaka atumbwami! Ne dia ndi ambuka diui diami diʼosengosengo,

⁷ Latuyalaka keli wulu ami la engawu kami. Utema ami atekamaka le ndi, ku dimi latukimanyiamaka. Diako mbatongenangenaka utema ami. Dimi layuwandulaka lʼesambu ami.

⁸ Latuyalaka keli wulu wʼantu andi, Ndu lungeli la nshimbela one lakandakiti iso.

⁹ Ushimbeli wudja aye, otshokole sangu diaye; Uyali ulami awo, la usuko awo pundju.