Esambu 26 - La Bible en Otetela (Bible K'Ekila) 1991

Eshikikelu kʼAkambu wʼUsimbwi

¹ Latuyalaka li, unyindja ne dia dimi latokendakendaka lu akambu ami wʼusimbwi. Dimi latekamaka le Latuyalaka, ku dimi haselo.

² Ombediki, we Latuyalaka, umpimbi! Ushishimi utema ami la wongo ami.

³ Ngandji kaye ka shikaa keko la ntundu kami; Dimi latokendakendaka lu kolamelu yaye.

⁴ Dimi hatudjaseka kame lʼakanga a kashi, Kuyanga mengola kame lʼakanga a lukesu.

⁵ Dimi latuhetshaka lusanganya la waku watutshaka kolo, Hatudjaseka kame lʼantu wa kolo.

⁶ Dimi latotshaka anya ami lu sambu kʼololo. Okone mbatumetaka lʼutshimba wʼediakelu kaye, we Latuyalaka,

⁷ Dia dimi mpangohango lʼaui wa lusaka, La nsanya akambu aye tshe wa mamba!

⁸ Dimi latukaka luudu ludjashiye ngandji, Ee, dihuli diudjashi lutumbu laye.

⁹ Tusanganyaki utema ami kame lʼantu wa kolo, Kuyanga lumu lami kame lʼatomboki,

¹⁰ Weli la anya wuludi too la kolo, Ndu weli la mbu yʼutshu too lʼanya awo wʼapami.

¹¹ Keli uku le mi, dimi latokendakendaka lu akambu ami wʼusimbwi. Untshunguli, umbuki ngandji ka mamba.

¹² Dikaka diami diambushikikala lu kete yukitanedi. Dimi layutumbulaka Latuyalaka lu sanganya.