Esambu 24 - La Bible en Otetela (Bible K'Ekila) 1991

Khumʼekanga ka Lutumbu

¹ Latuyalaka keli kanga kete ndu diango tshe dieli loko, Andja la wane watudjaseka loko,

² Ne dia ndi akayihiki ladiku diʼashi a waki, Akayishikike ladiku dia dula diʼashi.

³ Akona ayumbela lu dikuna dia Latuyalaka? Ayemala lu dihuli diandi diʼekila na?

⁴ One leli lʼanya wambotshama, la u tema a pudipudi; Lahakimo utema andi lu kashi, Lahatshibi la lukesu.

⁵ Ndi ayulungula otshoko uma le Latuyalaka, Ndu sambu kʼololo uma le Unyashungu panda kandi.

⁶ Wa lolonga lone watukuyangaka, Watuyangaka elundji kaye, we Unyashungu a Jakoba.

⁷ Kuki li, nyedie ete anyu! Nyuneli, nyu kuki yʼedjedja! Keli Khumʼekanga ka lutumbu oto.

⁸ Akona oso eli Khumʼekanga ka lutumbu? Latuyalaka, kanga wulu ndu wuki wuleki. Latuyalaka, kanga wulu lu ta.

⁹ Kuki li, nyedie ete anyu! Nyuneli, nyu kuki yʼedjedja! Keli Khumʼekanga ka lutumbu oto.

¹⁰ Akona oso eli Khumʼekanga ka lutumbu? Latuyalaka, Kanga lulimbilimbi, Ndi keli Khumʼekanga ka lutumbu!