Esambu 20 - La Bible en Otetela (Bible K'Ekila) 1991Dombelo Dia Nkundja Elembielo 1 Latuyalaka akukeli lu dombelo lu nshi ya pa. Lukumbu la Unyashungu a Jakoba lakulamaki! 2 Ndi akutumelaki ekimanyelu uma lu luudu lʼotemwelo, Akukikitshaki uma la Siona! 3 Ndi uhoki elambu aye tshe. Ndi alungulaki elambu aye wa lutshumba lʼongenongeno! 4 Ndi akushaki kene kalanga utema aye, Ndu akutshaki sangweyu diaye tshe! 5 Shu tayulimbolimbo lʼongenongeno ne dia elembielo kaye; Tayuhaneka ekuhu ka koi lu lukumbu la Unyashungu asu! Latuyalaka, uki dombelo dia nangu yaye tshe! 6 Kakiane, dimi lambeya nti: Latuyalaka atushimbelaka one lakandakiti iso. Ndi ayuwukelaka uma lʼedjaselu kandi kʼekila lʼulungu, Lʼekimanyelu ka wulu ka lunya landi la pami. 7 Amotshi watekamaka pusupusu yawo ya ta, ndu akina watekamaka falasa yawo. Keli shu tayudimulaka lukumbu la Latuyalaka, Unyashungu asu. 8 Vo watolembiamaka, watokokaka. Keli shu tatushikikalaka, tatemalaka too. 9 Latuyalaka, ashimbeli khumʼekanga, Atukeli lamʼolombasu. |
La Bible en Otetela © Allianee Biblique de la Republique Democratique du Congo, 1991
Bible Society of the Democratic Republic of Congo