Esambu 19 - La Bible en Otetela (Bible K'Ekila) 1991

Elimu la Diui Dia Unyashungu

¹ Ulungu atusanyaka lutumbu la Unyashungu; Diango dia lʼulungu diatutenyaka ulimu wʼanya andi.

² Yanyi yatulakanyaka yanyi kina; Utshu atushaka utshu ukina bewu.

³ Hawutukaka oteketa kuyanga asawu awo; Aui awo hawukema.

⁴ Keli aui awo watudianganaka lu kete tshe, Ndu asawu awo watukumaka la kuma yʼandja, Lene akahikela Unyashungu unya etumbu.

⁵ Unya atuyalaka uku utshuki a wadi lamʼatundutumbaka uma lu luudu landi. Vo watuyalaka la ongenongeno lu lokendo lawo uku pami ka wulu.

⁶ Vo atunelaka uma lu kuma kemotshi kʼulungu, Atetaka pulu ndu kuma kawo kekina: Nduku engo katushamaka lu yanyi yawo.

⁷ Olembe wa Latuyalaka eli ololo tshe, vo watululaka utema; Aui wa Latuyalaka weli shikaa, watushaka enginya yimba.

⁸ Adjangu wa Latuyalaka weli usimbwi, watongenyangenyaka utema; Elembe wa Latuyalaka weli pudipudi, watosenyaka ashu.

⁹ Woma wa Latuyalaka weli pudipudi, watutshikalaka pundju; Sambu ya Latuyalaka yeli mete, la ololo utu.

¹⁰ Yo ndeka paunyi ushinga wulu, ee, yo yatulekaka paunyi efula ya lutshula. Yo ndeka usanga wa djui mpe, ee, yo yatulekaka usanga wʼuma lu ehihi mpe.

¹¹ Sambu yako yatewulaka ukambi aye; Ee, wane watuyilamaka, weko la difutu dia wuki.

¹² Akona eya nimbitela munga yandi hita? Ombedia uma lu munga yami yahamalimbitela.

¹³ Ndu ushimbi ukambi aye uma lʼakambu wʼunginu, Vo tawumbulelaki! Ku dimi layuyala uluwanyi, Layuyindjama uma lu kolo ka wuki.

¹⁴ Aui wa unyo ami la tukanyi tʼutema ami Wayali ololo lu ashu aye, We Latuyalaka, Dive diami la Utshungudi ami.