Esambu 18 - La Bible en Otetela (Bible K'Ekila) 1991

Lusaka ne dia Etshungwelu

¹ Latuyalaka li, we wulu ami, dimi latukukaka ngandji.

² Latuyalaka keli dive diami, wumbe ami wa ta la utshungudi ami; Unyashungu ami, dive diami, lene atumushamaka, Engawu kami, dimama dia panda kami, lungeli lami la wuki.

³ Dimi layuhangohangoka nti: Latuyalaka atumbwami! Ku layushimbamela uma le atunyi ami.

⁴ Asukhu wa nyoi watonkomolaka, La dula diʼelanyelu diatumbutshaka woma.

⁵ Ekodi wa diumbu watunyingamaka, Tulunga ta nyoi tatutshimbaka.

⁶ Lamʼakimi lʼasui, dimi laketi Latuyalaka, Lakalelela Unyashungu ami. Uma lu luudu landi lʼekila, ndi akuki diui diami, Ndu delu diami diakukema lʼatui andi.

⁷ Ku kete yakasukasuka, yakadidima; Ndu atshina wʼakuna wakadidima, Wakasutshasutshama lamʼakandumala.

⁸ Dinga diakatumbi uma lʼehembe andi, Ndu lumbi la dja uma lʼunyo andi. Akalanga wakahete la lumbi lako.

⁹ Ndi akahuluya ulungu, ku ndi akakiti. Dingi dia tshududu diaki la tshina diʼakaka andi.

¹⁰ Ndi akahema ladiku dia okeruba, akafumbo, Akatafumboka lu lopepe.

¹¹ Ndi akete udjima eshamelu kandi, uku dipema dia mbukumba, Ashi wʼedima la wangi wa tshududu wakukumbi.

¹² Wangi andi wa ngimbi waketi lʼusasi wakatatshokaka la ntundu kandi, Wakalosha mboka yʼave la akalanga wa dja.

¹³ Latuyalaka akakhungula lʼulungu, KhumʼUlungu akatundja diui diandi, Kame la mboka la akalanga wa dia.

¹⁴ Ndi akuki atunyi ami pitu, akahandjula. Ndi ikafudiya akuma wa ndjadi, akahenyahenya.

¹⁵ Kete ya la tshina diʼashi yakenama, Atshina wʼandja wakashwama Uma lu dianelu diaye, we Latuyalaka, La lundju lʼefufelu kʼehembe aye.

¹⁶ Ndi akasimbula lunya uma lʼulungu, akankimela, Ndi akantundja uma lʼashi efula.

¹⁷ Ndi akantshungula uma le uhetshi ami a wulu, Uma le atunyi ami wakandekaka wulu.

¹⁸ Vo wakayakaka le mi lamʼakimi la pa, Keli Latuyalaka aki usuko ami.

¹⁹ Ndi akanombola uya lu dihuli dia hwe, Akanshimbela, ne dia ndi atongenengenelaka.

²⁰ Latuyalaka akantshela uku ololo ami, Akanfuti uku pudipudi kʼanya ami,

²¹ Ne dia dimi lakakolamelaka lu mbuka ya Latuyalaka, Dimi kundjala la dikambu dia kolo dia minyami uma le Unyashungu ami.

²² Adjangu andi tshe waki la ntundu kami. Dimi kombetola uma lʼelembe andi.

²³ Ndu dimi laki ololo la ntundu kandi, Dimi lakayalami uma lu kolo.

²⁴ Okone Latuyalaka akanfuti uku ololo ami, Ndu uku pudipudi kʼanya ami lu ashu andi.

²⁵ Le kanga ketshi, we ayuwuka ketshi; Le kanga ololo, we ayuwenya ololo aye.

²⁶ Le kanga pudipudi, we ayuwenya pudipudi kaye; Le kanga lukanyi, we ayutshela uku lukanyi landi.

²⁷ We atushimbelaka akanga a ndjakitshakitsha, Atukitshakitshaka tulendu ta lahi.

²⁸ Elu, we katohetshaka uwa ami, Usasi wa Latuyalaka, Unyashungu ami, atuminyiaka udjima,

²⁹ Elu, uma le ye mbatumolembiaka ului wʼalimbi, Uma lu wulu wa Unyashungu ami, mbatumulimboka eheli ka lukumbu.

³⁰ Mbuka ka Unyashungu katuyalaka ololo tshe. Diui dia Unyashungu diatushidiyamaka. Ndi eli engawu ka wane tshe watekamaka le ndi.

³¹ Akona eli Unyashungu, naka aha Latuyalaka? Ndu akona eli Dive dia wuki, naka aha Unyashungu asu?

³² Unyashungu atumbishaka wulu. Ndi atuluwanyaka mbuka kami ololo tshe.

³³ Ndi ateteka ekulu andi esadi uku lufumbo; Atunkitshaka lʼahuli wa ladiku.

³⁴ Ndi atetshaka anya ami dia ndo ta, Ku anya ami wateyaka nema uta wʼohotela.

³⁵ We atumbishaka engawu ka panda kaye. Lunya laye la pami latunsukeka; Memakana kaye katumbeteka wuki.

³⁶ We atonkokwelaka mbuka katumokendakendaka, Ku akaka ami hawutoseloka.

³⁷ Dimi latuyelaka atunyi ami, latuwandaka; Hatukalulaka tshikima lambalanya.

³⁸ Dimi latawediawediaka, edja ndu vo hawuyeya munela. Vo watokokaka la tshina dia akaka ami.

³⁹ We atunkikitshaka lu ta, Atolembiaka wane watondoshaka.

⁴⁰ We atukadimulaka ekongo wʼatunyi ami uya le mi, Ku dimi latushilaka wane watumpetshaka ushiki.

⁴¹ Vo watulelaka, keli nduku untu la mbashimbela. Vo watulelelaka Latuyalaka, keli ndi hatakaluyaka nduku diui.

⁴² Dimi latatshutshunaka uku ditshu diatembaka lopepe, Latahotshahotshaka uku loteke la lʼesese.

⁴³ We atuntshungulaka uma lu tamu ta wedja, Atunkitshaka la diku dia wedja tshe. Ku wudja wakimi kumbeyaka, watunkambelaka ulimu.

⁴⁴ Vo watukitanyiaka aui ami kamʼateketami. Asi wedja watumandulaka.

⁴⁵ Asi wedja watolembaka, Watutumbaka uma lu wembe awo wa ta wayadidima.

⁴⁶ Latuyalaka eli la lumu, dive diami atumbwamaki, Unyashungu a panda kami ediamaki!

⁴⁷ Unyashungu atosomboyaka lu dikambu diami, Atunkitshikitshiyaka wedja.

⁴⁸ Ndi atuntshungulaka uma le atunyi ami. Ee, we atumbediaka ladiku dia wane watondoshaka; Atunshimbelaka uma le tomboki.

⁴⁹ Okone mbayumukukaka lusaka, we Latuyalaka, lʼatei wʼasi wedja. Dimi layimbaka esambu wa diandu ne dia lukumbu laye.

⁵⁰ Ndi atushaka khumʼekanga kandi ditshungwelu diandi. Ndi atukaka one lakandakiti iso ketshi, Le Davidi la tukanula tandi pundju.