Esambu 17 - La Bible en Otetela (Bible K'Ekila) 1991

Dombelo Dia Nkundja Elamelu Uma le Akanga a Somboki

¹ Latuyalaka, uki mete kʼakambu ami, uhukami delu diami. Uhuke tui lu dombelo diami diatumolombaka lʼelomo waha la lukesu.

² Eyindjelu kami katumbi uma le ye, Ashu aye wendaki kene keli ololo.

³ Naka we ayedika utema ami, naka we ayumenda lʼutshu, Naka we ayunshishima, we hutana nduku engo ka kolo le mi. Kanyi yami hayutshikitana lʼaui watumba uma lʼunyo ami.

⁴ Lʼatei a ditshelu diʼantu, dimi latulamaka diui diʼuma lʼunyo aye. Uma lu diui diako mbatumuyalamaka lu mbuka ya tomboki.

⁵ Ekulu ami watushikikalaka lu mbuka yaye, Akaka ami hawutoseloka.

⁶ Unyashungu li, dimi latuketaka ne dia we atumbukelaka! Usukanya tui diaye uya le mi, ulungi diui diami.

⁷ Enya antu ngandji kaye ka mamba, we latushimbelaka wane watuyangaka eshamelu; Ndu we atutshungulaka la unya laye la nami lima le waku watahetshaka.

⁸ Unamaki uku ukeli wa su. Unkumbi la didjidji diʼahafu aye.

⁹ Uma le antu wa kolo watunsuyaka, Atunyi ami a wulu watunyingaka.

¹⁰ Vo watudihaka etema awo, Watuyalaka lʼaui wa lahi lʼenyo awo.

¹¹ Kakiane wambutuyela lu wanya, wambutudinga, Wambutotonga dia ntokosha la kete.

¹² Ndi eli uku tambwe kahahula nyama kakatandji, Uku ona tambwe kuhulami lʼahuli wa usheshe.

¹³ Uneli, we Latuyalaka, uhumani la ndi, uwumbi. Untshunguli uma le untu a kolo la yombo yaye.

¹⁴ Latuyalaka li, untshunguli la lunya laye uma le antu wa kete nye. Vo weko la etenyi kawo lu lumu lone. Uludia akundju awo lʼekundji aye, Anʼawo waluti, Watshikeli ekanʼawo.

¹⁵ Keli le mi, dimi layendaka elundji kaye la sambu kʼololo. Dimi layuludiama lamʼayumeto lʼefanelu kaye.