Esambu 149 - La Bible en Otetela (Bible K'Ekila) 1991

Wambosengasenga Isariyele Dia Mandula Latuyalaka

¹ Nyanduli Latuyalaka! Nyimbeli Latuyalaka usambu wʼuyuyu! Nyimbaki diandu diandi lu lusanganya lʼekilami!

² Isariyele angenengenele one lakutungi! Ana wa Siona watamanya ngenangena ne dia khumʼekanga kawo!

³ Watumbuli lukumbu la Latuyalaka lu wenye. Nyimbeli Latuyalaka esambu wa diandu lu lohenga ndu lu losese,

⁴ Ne dia Latuyalaka atongenengenelaka wudja andi. Ndi ayolenga akanga a memakana la panda.

⁵ Ekilami wayali la ongenongeno lu lutumbu, Wimbaki esambu wʼongenongeno lu tangi yawo!

⁶ Lutumbu la wuki la Unyashungu layali lʼenyo awo, Nyu yombo ya diesa wedi ehendi lʼanya awo,

⁷ Ne dia nsomboya wedja, Ndu dia nsuya antu,

⁸ Dia nkeleka khumi ya dikanga yawo la molola Ndu antu awo a waki lu mbeti ya mbulu,

⁹ Dia mbalumbuya elumbwelu kakafundama. Nyandulaki Latuyalaka!