Esambu 148 - La Bible en Otetela (Bible K'Ekila) 1991

Wambosengasenga Atungami Tshe Dia Mandula Latuyalaka

¹ Nyutumbuli Latuyalaka! Nyutumbuli Latuyalaka uma ladiku diʼulungu! Nyutumbuli lu ahuli wa ladiku!

² Ny utumbuli, nyu andjelo andi tshe! Nyutumbuli, nyu lulimbilimbi landi tshe!

³ Unya la ngondo, nyutumbuli! Nyu toto tshe ta ngaingai, nyutumbuli!

⁴ Ulungu wa ladiku diʼulungu, utumbuli, Ndu nyu ashi weli ladiku diʼulungu.

⁵ Vo tshe watumbuli lukumbu la Latuyalaka! Ne dia ndi akati diui, ku vo wakatungama.

⁶ Ndi akashikike pundju, pundju. Ndi akawadjela elembe, wahandakadimulaki pundju.

⁷ Nyanduli Latuyalaka la tshina dia kete, Nyu wa shimiamba ndu nyu ehongo tshe,

⁸ Dja la mboko ya mvula, lungi lʼekama la tshitshi la lungi la tshitshi, Lopepe la wulu, latutshaka aui andi,

⁹ Ekungu lʼakuna tshe, Etamba wʼelua la etamba a waki tshe,

¹⁰ Nyama la dungalunga tshe, Diango diayakutula la fudu yatufumboka,

¹¹ Khumi ya dikanga ya la kete la wedja tshe, Ana wa khumi ya dikanga la embadi tshe wa la kete,

¹² Elongo wʼapami la esekaseka wʼamantu, Esumbi la ana wa tutshitshe.

¹³ Vo tshe watumbuli lukumbu la Latuyalaka! Ne dia lukumbu landi lutu mbeli ladiku. Lutumbu landi leko la diku dia kete ndu ladiku diʼulungu.

¹⁴ Ndi akafudia wulu wa wudja andi: Lutumbu ne dia ekilami andi tshe, Ne dia asi Isariyele, antu weli lasuki landi. Nyutumbuli Latuyalaka!