Esambu 146 - La Bible en Otetela (Bible K'Ekila) 1991

Diandu le Unyashungu ne Dia Etsha Andi wʼUsimbwi

¹ Nyandulaki Latuyalaka! Utema ami, utumbuli Latuyalaka!

² Layutumbulaka Latuyalaka lamʼekimi la lumu, Layandulaka Unyashungu ami lu nshi yami tshe.

³ Tanyekamaki ana wa khumi ya dikanga, Kuyanga le untu laheyi nyushimbela.

⁴ Lumu landi latutumbaka, ku ndi atukalulaka lu kete. Ku lushi lako, tukanyi tandi tayulanyema.

⁵ One latukimanyiamaka le Unyashungu a Jakoba, eko la oneenongeno. Ndi atukitshaka elungamelu kandi le Latuyalaka, Unyashungu andi,

⁶ Lakatungi ulungu la kete, Lʼashi a waki la diango tshe dieli loko, Atulamaka mete pundju.

⁷ Ndi katulumbwelaka amenyi fono akambu, Katuleshaka avushi ndiala. Latuyalaka katutshungulaka asi lukanu;

⁸ Latuyalaka katosenyaka akanga a tutshungu; Latuyalaka katusimbulaka wane wukutami; Latuyalaka katukaka antu wʼololo ngandji.

⁹ Latuyalaka atulamaka angendangenda, Atusambaka wadi waki edu la ana wa tshiki. Keli ndi atulanyaka mbuka ka antu wa kolo.

¹⁰ Latuyalaka atulelaka pundju. We Siona, Unyashungu aye atutshikalaka lu nonga tshe! Nyanduli Latuyalaka!