Esambu 143 - La Bible en Otetela (Bible K'Ekila) 1991

Dombelo Dia Nkundja Etshungwelu la Elombwelo

¹ Latuyalaka li, uki dombelo diami, uhukami osengosengo ami! Unkaluya diui lu kolamelu yaye ndu lu ololo aye!

² Tunumbuyaki, dimi ukambi aye, Ne dia nduku untu leli ololo lu ashu aye.

³ Utunyi akasuya utema ami, Akahotshahotsha lumu lami pulu ndu lu kete, Ndi akambidjasha lu ahuli wa udjima, Uku wane wambuvokaka.

⁴ Okone lumu lami lambolembiama, Ndu utema ami ambukalema.

⁵ Dimi latuhoka nshi yʼedjedja, Latukanaka yimba lu etsha aye tshe, Latuyambulaka dia elimu wʼanya aye.

⁶ Dimi latusimbulaka anya ami utsha le ye. Utema ami atukukumbulaka, uku kete ya wumu mbahumba ashi.

⁷ Latuyalaka li, umbukeli esadi, Lumu lami lambuheko. Tumbisheki elundji, Dimi tukuyala uku waku wambuhulo utsha lʼUdimu a Pengandu.

⁸ Umbukia ngandji kaye ka mamba kʼolomo, Ne dia le ye katumekamaka. Unimbitshiya mbuka ka dimi nkendakenda, Ne dia dimi latediaka utema ami utsha le ye.

⁹ We Latuyalaka, unshimbeli uma le atunyi. Le ye keli eshamelu kami.

¹⁰ Umbetshaki dia ntsha lulangu laye, Ne dia we keli Unyashungu ami. Lumu laye leko ololo, onombolaki lu mbuka kʼusimbwi!

¹¹ Latuyalaka li, umbululi ne dia lukumbu laye! Lu sambu kaye kʼololo, utundja utema ami uma lu pa!

¹² Lu ngandji kaye ka mamba, ulanya atunyi ami, Ushili waku watusuyaka utema ami ushiki! Ne dia ukambi aye mbemi.