Esambu 139 - La Bible en Otetela (Bible K'Ekila) 1991

Unyashungu Ndjalaka lu Ahuli Tshe, Ndu Mbeyaka Akambu Tshe

¹ Latuyalaka li, we akambedika, akanimbitela.

² We mbeyaka lamʼatumudjaseka ndu lamʼatumunelaka, We manaka tukanyi tami tshe fundu.

³ We mbeyaka lene atumutshokaka ndu lene atumetamaka, We nimbitelaka mbuka yami tshe.

⁴ Nduku diui diatuyalaka lʼunyo ami, Ku we atadimani fundu, we Latuyalaka.

⁵ We akakumbela uma lʼokongo ndu uma la ntundu, We akambahe lunya.

⁶ Ewu kene keko dikambu dia mamba le mi. To keli ladiku, haleyi nkuma le to.

⁷ Lendi ayumutsho dia mangana uma le lumu laye? Lendi ayumulawo uma lʼelundji kaye?

⁸ Naka layumbela utsha lʼulungu, we eko leko; Naka layutsho lʼUdimu a Pengandu, we eko leko.

⁹ Naka layufumbo lʼahafu wa pindju, La ntudjase la kuma yʼashi a waki,

¹⁰ Ndu leko lunya laye layonombola, La lunya laye la pami layunsukela.

¹¹ Naka layuta nti: Mete, udjima ayunkumba, Usasi wa lʼutshimba ami wayuyala utshu,

¹² Keli udjima heyi mbishe engo uma le ye, Utshu atohetaka uku yanyi, Ndu udjima ndu usasi weli pupu le ye.

¹³ We kakatungi utema ami, We kakambidji lʼutema a nyomi.

¹⁴ Dimi layukukaka lusaka, ne dia lakatungama etungelu ka woma ndu mamba, Elimu aye weli mamba, Utema ami mbeyaka dikambu diako ololo.

¹⁵ Dimba diami kumbishama uma le ye Lamʼakamatungama lu usheshe, Lamʼakamatahamaka lu tapa dia nyomi.

¹⁶ Ashu aye wakamenaka lamʼakimi ehuluku; Ndu biyu diami tshe diakafundama, Ndu nshi yakasonwama dikambu diami, La ntundu kʼakambu ane watayala.

¹⁷ We Unyashungu, ndi tukanyi taye le mi dimena li! Ndi efula keli wuki ato li!

¹⁸ Utunduyala dimi ntali, tshiki to mbeyaka ndeka seke ya losenga efula; Lamʼemomi, ku dimi la ye.

¹⁹ Mete, Unyashungu, we ayudiaka antu wa kolo. Okone nyu atomboki, nyumanganeli!

²⁰ Vo watoteketaka kolo lu dikambu diaye. Atunyi aye watudimulaka lukumbu laye udimuladimula!

²¹ Latuyalaka li, dimi hatuhetshaka wane watukuhetshaka uka? Dimi hatuyalaka la lunyangu le waku watukotombokwelaka?

²² Dimi latahetshaka la luhetshu la shikaa. Mete, vo weli atunyi ami,

²³ Unyashungu li, unshishimi, umani utema ami fundu, Ombediki, ulimbiteli tukanyi tami!

²⁴ Umendi kana dikambu dia kolo dieko le mi, Onombolaki lu mbuka ka pundju!