Esambu 121 - La Bible en Otetela (Bible K'Ekila) 1991

Ulami wa Isariyele

¹ Dimi layediaka ashu ami utsha lʼakuna; Uma lendi ayuya ekimanyelu kami?

² Ekimanyelu kami katuyakaka uma le Latuyalaka, Lakatungi ulungu la kete.

³ Ndi hetawo dikaka diaye nselo; One latukulamaka hotokokala.

⁴ Enda, one latulamaka Isariyele, Hatotokokalaka kuyanga ndala djo.

⁵ Latuyalaka keli ulami aye, Didjidji diandi diatuyalaka lu lunya laye la pami.

⁶ Usasi a unya hawukokomolaki la yanyi, Kuyanga wa wedi lʼutshu.

⁷ Latuyalaka ayukulamaka uma lu kolo tshe, Ee, ndi ayulamaka lumu laye.

⁸ Latuyalaka ayukulamaka lʼetshwelu kaye ndu lʼekalwelu kaye, Umaka kakiane ndu pundju.