Esambu 12 - La Bible en Otetela (Bible K'Ekila) 1991

Dombelo Dia Nkundja Ekimanyelu ka Nembia Antu wa Kolo

¹ Latuyalaka li, unkimanyia ne dia nduku ololo lekiko. Ndu kolamelu yambumo lʼatei wʼantu.

² Vo tshe watutanelaka kashi; Elomo awo weli la aui wa diandu dia lukesu. Vo watutaka aui la etema ehendi.

³ Latuyalaka li, uhimbuli elomo tshe weli la diandu dia lukesu, La lulimi latutaka akambu wa ndjasema!

⁴ Wane watutaka vati: Shu tatuyalaka la wulu uma lu nimi yasu. Elomo asu weko kame la su, Akona ayuyala umbahamedi asu?

⁵ Latuyalaka kata ati: Kakiane dimi layunela ne dia asui wʼomenyi fono, Ndu ne dia tukuku tʼalelu tʼasi wula. Layuwaela panda katuwukumbulaka.

⁶ Aui wa Latuyalaka weli aui wa pudipudi, Uku fesa kakawalelola tena esambeli lu khuka ka dja, dia kiete pudipudi.

⁷ Latuyalaka li, we ayalamaka, Ayuwaumba pundju uma lu lolonga lone!

⁸ Lamʼatulelaka untu luleki kolo, Antu wa kolo watukindulaka lu beke tshe.